La Parrilla Steakhouse：稱心3道菜午餐

約咗親友食晏，自不然唔會待慢，佢都鍾意鋸吓扒，所以，就揀咗主打阿根廷菜嘅「La Parrilla Steakhouse」，一來好幾年前食過，氣氛唔錯，食物有水準，牛扒出色，二來對佢哋嘅３道菜午餐幾欣賞，覺得性價比高，值得再訪。

餐廳位處雲咸街商廈1樓，走進餐廳，地方都幾大，裝修甚有特色，一室仿木屋嘅感覺，加上紅色仿磚牆，配以牆上不少壁畫，極有拉丁風情。而近窗一排窗口位，配以高腳枱櫈，對正「大館」，景觀更開揚、舒適。

午市套餐分兩個價：$219、$298，同樣包咗前菜、主菜、配菜及飲品，但前者主菜會喺烤雞、意大利麵、漢堡、魚鮮……之類，而後者主菜會喺幾款招牌牛扒，唔介紹加多少少錢，仲可以升級其他精選特級牛扒。此外，亦可以加錢轉其他飲品，或加配甜點。

Focaccia意大利香草包

着兩前菜一並送上有香草包，切成長條狀，除咗落重香草，加咗唔少橄欖油之外，面頭仲會灑上鹽粒，有份鹹香鮮味，而包身口感超軟熟。

Fugazetta Empannada芝士洋蔥餡餃

大大件餡餃炸得金黃，外層酥脆不膩，裡面加咗唔少芝士同洋蔥粒，芝士溶到透，好強嘅拉絲效果，食落香濃惹味，再佐以蕃茄莎莎，確喺唔錯。

Superfood Salad 特級沙律
餐牌已標示咗呢道沙律有好多食材，包括沙律菜、紅蘿蔔、烤粟米、牛油果蓉、鷹嘴豆、青瓜同埋車厘茄，再混入柑橘醬。沙律本身就夠晒新鮮，口感豐富，酸酸甜甜嘅柑橘醬就令人食落清爽更開胃。

Green Halibut大比目魚

主菜之一就揀咗大比目魚配普羅旺斯雜燴，比目魚煎到外皮焦脆，魚肉嫩滑細緻，又有魚鮮味，下面墊有大量普羅旺斯雜燴，即喺燴雜菜，用上多種蔬菜，富營養，味道酸酸咪咪，好醒神。

Rump Steak牛冧排

另一主菜就當然要試試店家嘅牛排，牛冧排標明300g，睇份量就肯定足。牛排外層煎到微焦，咬落有焦脆口感，而要5成，火候剛好，色澤粉嫩，肉嫩味濃，又富肉汁，沾上芥辣，真好食。

Roasted Brussels Sprouts 烤椰菜花

配菜都喺另上，共有4款選擇。細細粒嘅烤椰菜花咬落外層微脆，內裡軟熟得嚟又有啲咬口，細嚼有椰菜花本身嘅清甜菜味。雖然簡簡單單，但好啱口味。

Garlic & Truffle Mash Potatoes 大蒜松露馬鈴薯泥
仲記得之前所試嘅奶油焗薯仔好正，而呢個馬鈴薯泥亦高水準，薯泥口感非常幼滑，再加了大蒜同黑松露醬，真喺唔好食都幾難。

Ginger Ale、Tonic Water

今日食嘅嘢都夠濃味，配汽水都唔錯。小弟就揀咗Ginger Ale，親友揀Tonic Water，味道就唔會話有咩太特別，但勝冰涼清爽，配牛排就最好不過。

晌度食晏唔止環境舒服，食物做得有水準，而且，服務亦好到位，侍應知道我哋喺共享所有菜式，都會額外遞上餐碟，又不時為我們添水，親友亦非常滿意呢一餐。

個人評分
味道：8/10
環境：8/10
服務：8/10
抵食：8/10
平均每人消費：HK$284

餐廳資料：
La Parrilla Steakhouse
地址：中環雲咸街77號嘉兆商業大廈1樓
電話：2637 8555