玫瑰冰室小廚：「瑰」精不貴多

小弟晌石硤尾長大，當然白田會成日嚟，但自結婚後搬離呢區，大大話話我諗廿年都未嚟過白田呢個小社區。今晚約咗個麻甩老死嚟聚一聚，選址「玫瑰冰室小廚」食吓小炒，緬懷一下過去，重臨白田發覺成個環境都唔同晒。

聽個餐廳名就知係咩定位，日頭冰室，夜晚小廚，所以環境格局同大多數茶記無太大分別，喺多咗少少大圓枱，而環境新簇，光猛整潔，侍應幾好禮貌，又幾好傾喎。

先掃一掃餐牌，晚市都幾多選擇，小食、湯品潮州打冷、滷水、推介菜式、小炒、四川風味，海鮮……等等。

此外，又有一系列大廚推介菜式同晚市套餐，都算應有盡有喇！

潮式香蔥蜆仔肉

平常食潮州嘢，好多時奉送嘅前菜小碟都喺鹹酸菜，但今次喺香蔥蜆仔肉，真喺越嚟越少食到，蜆仔肉鹹鹹哋，餸潮州粥一流。

滷水鵝件 $148
滷水喺潮州菜嘅經典，點可以錯過，食鵝就梗喺揀鵝件啦，連骨帶肉，鵝件堆得滿滿，但其實下面墊咗啲滷豆腐嘅，哈哈！滷水醇厚沉實，滷得入味，鵝肉嫩口，有陣陣鵝肉香味，連帶少少油脂香；豆腐滑溜，有豆香，同樣滲出醇香滷水味。

豉椒炒蜆 $98

小炒中，豉椒就最得人心，因為豉椒炒乜都惹味好食，伴飯絕隹。講番啲蜆，吐足沙，蜆肉都唔細粒，味道好鮮甜，的確惹味。

潮式香菜墨魚餅 $128
墨魚餅炸到一身金黃，份外吸引，而墨魚餅打到好彈牙，仲有少少墨魚粒粒增加咗啲咬口感，裡面混入咗香菜，自然帶點清新香味，再沾上少少蜜糖，雖然喺炸嘢，但即時潤晒。

Sapporo啤酒 $38
睇見我哋點嘅嘢食就知喺餸酒好朋友啦，店定正正做緊大枝Sapporo啤酒買一送一優惠，即喺$19 / 枝，侍應更話一次飲唔使兩枝都無問題，可以拎走，所以，我哋就啤一啤佢，再者，Sapporo啤酒都幾易入口。

椰汁豆沙糕
最後，走出去埋單，被侍應嗌番轉頭，因為仲有甜點奉送，雖然只喺一件椰汁豆沙糕，但做足10層，心意都返嚟啦，況且，又真喺幾好食喎，既有椰汁香，又有紅豆嘅清甜。

今晚簡簡單單嘅一餐，志在聚舊，但難得啲嘢食又唔錯，高高興興啤一啤，何等賞心樂事！

個人評分
味道：9/10
環境：7/10
服務：9/10
抵食：9/10
平均每人消費：HK$225

餐廳資料：
玫瑰冰室小廚
地址：石硤尾白田邨白田商場LG樓LG311號舖
電話：6803 6320