PARKSIDE@NINA：「Park」案叫絕

成日見啲人貼出「PARKSIDE@NINA」下午茶嘅貼文，加上佢哋超高嘅天花，都好有興趣嚟試，不過，最後就無嚟食下午茶，反而同老婆嚟食晚飯慶祝一下。

單睇門面，真喺唔覺有咩特別，但走到入去就發現大不同。餐廳環境本身都幾大，近門口嘅一部份如一般西餐廳模樣，但天花以弧形線條加巨型乾花群成為亮點。

然而，較入一排近窗嘅位置就喺全餐廳嘅焦點位，除咗一排馬蹄位之外，超高嘅波浪拱形天花喺打卡位，空間感超強，加上各種燈效，既浪漫，又悠閒！

雖然散點有唔少選擇，但睇勻都喺叫晚市套餐抵，套餐定價$428，已包沙律、餐湯、主菜、甜品及餐飲，主菜嘅選擇4揀1，不過，當中有一款主菜需額外加錢。

煙三文魚藜麥沙律

基本上，所有菜式都會列明食材成入，就好似呢一道沙律就以羽衣甘藍、青蘋果絲、車厘茄加煙三文魚及藜麥組成，再淋上柚子熱情果汁，味道酸爽清新，開胃好食，啲食材食得出好新鮮，用料的碓不賴！

蘑菇忌廉湯

賣相雖然無咩花巧，但絕對喺真材實材，用上牛肝菌，一入口啲菌味超濃郁，啖啖都喺精華咁，而口感幼中帶粗，意思個忌廉湯本身質感好柔滑，但湯內混有微微菌粒，添加咗少少口感。

焗比目魚

老婆就最鍾意食魚，所以，心無二意就相中比目魚。比目魚煎到外皮焦脆，魚肉嫩滑細緻，又有魚鮮味，下面墊有大量炒扁豆、炒蘑菇、薯蓉，並佐以鰹魚忌廉汁，值得一提喺啲薯蓉打得超滑，好有薯仔味，鰹魚忌廉汁亦都好得！

烤肉眼牛扒 +$65

平常我就會揀5乘熟，但就番老婆，佢唔食得太生，就要咗7乘，出嚟嘅成品都好唔錯喎，火候拿捏好，切開一睇，色澤仍帶點粉嫩，肉質軟腍，肉味濃又富肉汁，外層有少少焦脆感，沾上青胡椒汁，更加好食，，而且，份量都幾足；伴以薯條、炒蘑菇、西蘭花及、車厘茄，薯條香口甘脆，卻無半點油膩感。

麵包布甸

話時話，都好耐無食過呢一款甜點，今晚就可以回味一吓。麵包中嘅蛋漿，睇得到加入咗雲呢拿籽，仲有小紅莓乾，所以，麵包布甸本身軟熟好食，又有牛油香同蛋香，加埋一小球軟滑富奶香嘅士多啤梨雪糕，真窩心。

熱檸水、熱咖啡
食甜品又點可以無杯熱咖啡襯一襯，咖啡味道醇和芳香，好襯個麵包布甸，而啲牛奶亦熱過，喺一份心意；而老婆向來講求健康，所以，次次都喺熱檸水，都好，可以解一解膩。

臨走時，晌門口棟咗個生日優惠推廣，凡星期一至四，4個人嚟幫襯晚市就放生日蛋糕一個或紅酒一支，有得諗喎！

整體而言，地方大，環境好，又舒服，侍應有禮貌亦招呼熨貼，最緊要都喺用料好，製作有誠意，咁先讓客人覺得值得再嚟，而今晚又的確喺一次好好嘅用餐體驗。

個人評分
味道：9/10
環境：9/10
服務：8/10
抵食：9/10
平均每人消費：HK$507

餐廳資料：
PARKSIDE@NINA
地址：香港荃灣楊屋道8號如心廣場一期2樓201號舖
電話：2117 4681