嚐客 Savour：搵食「嚐」態

因為早前腳傷，抖咗一大段時間，見好得七七八八就約埋老死踩番轉單車，但唔敢踩得太盡，只喺由太和踩到去上水「大水渠 」，再過埋羅湖邊境嘅「得月樓警崗」，最後踩返太和食晏，老友就推介呢間「嚐客」。

鋪仔細細，格局都喺一般茶記咁嘅樣，裝修簡簡單單，左右兩排卡位，中間有啲細細張圓枱。較入嘅位置因為有埋圓枱就有啲逼，但勝在光猛整潔，嚟得茶記幾都喺咁上下。

呢度午市嘅選項非常之多，有一系列特價嘅午市粉麵飯，賣$52到$54，另外又有一系列午市客飯，賣$68，仲有午市扒餐添。如果想食得輕型啲、食有平啲，可以考慮常餐，只喺四十幾蚊。

而餐具、基本調味料、牙簽就放晒晌枱上，如果想要紙巾，可以喺出面啲櫃位攞。

明火例湯

一落好單，阿姐就送上是日例湯，果然好例湯，青紅蘿蔔煲豬骨，當然，驚喜就無，但飲落都足料同夠老火。

時菜牛腩濕炒河 $54

老友話乾牛河食得多，所以，今次就揀咗個濕炒嘅牛腩河，一睇就知好夠碟頭，河粉多，牛腩又多，我都試咗嚿牛腩，幾入味，咬落又鬆化。濕炒就被乾炒無咁油膩，撈埋啲芡汁，幾好味，而啲河粉都夠滑溜。

馬來炒貴刁 $54

小弟就揀咗個炒貴刁，因為平時都好少食貴刁，同樣都喺大大碟，同埋裡面有好多料，蝦仁呀，叉燒呀，洋蔥呀，芽菜……等等 ，而且炒落都算乾身，唔油膩，又有咖哩香，算喺炒得有水準。

熱奶茶

嚟到茶記，熱奶茶哋必然之選，杯奶茶食嘅色澤有少少偏淡，其實飲落茶底都香嘅，不過，個人覺得奶未重咗少少而已。

雖然嚟到茶記都喺自己搵位，但因為正值飯市，客人比較多，安排入座就變得有少少混亂，招呼方面一般般咁啦，況且我哋兩個都喺嚟醫肚，啲嘢OK就算，食飽就走。

個人評分
味道：7/10
環境：6/10
服務：6/10
抵食：8/10
平均每人消費：HK$54

餐廳資料：
嚐客 Savour
地址：太和大埔太和路12號太和邨愛和樓3樓306-307號舖
電話：2861 0610