蓮香樓 Lin Heung Lau：思「香」情懷

香港一啲真真正正嘅懷舊茶居已經賣少見少，「蓮香樓」算喺少數碩果僅存嘅舊式茶居，不過講嚟有啲怪，小弟晌中環工作咗廿幾年，真喺未幫襯過「蓮東樓」，今次到訪算喺託友人之福，一齊嚟飲夜茶，嘆點心。

其實門面都已經好有懷舊風，尤其牌匾同大紅燈籠高高掛，而上到2樓，更倒有幾分時光倒流嘅感覺， 返咗去上世紀啲茶居。雖然應該有翻新過，但情懷依舊。

而最有歷史感嘅物品，喺牆上掛起紅底白字嘅膠菜牌，除咗一手靚字之外，就喺底下價目嘅「花碼」，以前街市常見，依家真喺好難得會遇到，我哋啲老鬼當然識睇識寫，但後生一輩可能見都未見過。

佢哋點心全日供應，日間更有姐姐推住啲經典點心車，不過，晚市就無喇，只喺出面擺放咗好多點心，自助形式，拎幾多再吸印仔。溫馨提示，日頭點心就會分頂特大中小點，而晚市貴啲，點心一律$48。

蓮香蝦餃皇 $48
外觀都大大粒又夠晶瑩，外型都幾工整，摺紋夠細緻，微微透出蝦肉色，咬落外皮軟熟卻唔黏牙，裡面全部都喺鮮蝦，非常之爽口，又有蝦鮮味。

蟹籽燒賣皇 $48

對比蝦餃皇，燒賣皇賣相就差咗少少，不過，就真材實料，豬肉餡唔太肥，又幾鬆化多汁。因為加埋蟹籽一齊蒸，所以，色澤變得淡啞少少，如果蒸好後先再加蟹籽，應該會靚仔好多。

火龍果帶子餃 $48
朋友拎咗呢籠帶子餃，初嚐都無乜點為意，照食如是，事後先知加入火龍果元素，但食嘅時候真喺唔太感受到，之但喺賣相幾靚，餃皮夠薄，帶子又幾爽口，確喺幾好食。

燒腩卷 $48

一個臘腸卷，一個燒腩卷，依家喺啲老茶居、老酒家先仲會做，因為唔健康嘛！一籠兩客燒腩卷，包內除咗有燒腩肉，仲墊咗件芋頭，味道唔錯，但朋友嫌燒腩唔夠肥，哈哈！

富貴金錢肚 $48
金錢肚喺點心嘅經典之一，唔喺嗌鳳爪，就會嗌金錢肚。呢碟金錢肚，絕對喺重口味之作，個醬汁極之濃郁，撈飯就肯定一流，而口感軟腍，底下墊咗啲芋頭，索晒汁就更惹味。

蝦球炒麵 $168

另外，嗌碟炒粉麵墊吓肚，有好幾款都想試，最後老友發辦嗌咗炒麵。一睇賣相，啲蝦球好大隻，好有睇頭，咬落超爽口，蝦味濃，絕對喺新鮮靚貨；而炒麵做得脆口，茨汁又剛好，唔會話太多好似漿糊咁，讚呀！

補血紅棗糕 $48

接近尾聲，要有啲甜品先似樣，叫咗籠紅棗糕，可能蒸得有微微過火，外觀有少少塌，不過，棗味濃郁，口感軟糯，亦唔算好黏牙。

椰皇燕窩燉鮮奶 $52

老友就再追加一客椰皇燕窩燉鮮奶，睇樣唔覺，入口方知熱焫焫，都幾熨口，但啲燉鮮奶質感超嫩滑，甚富奶香，而面頭加咗好多燕窩，落得一啲都無手軟，襯燉鮮奶，直頭女生恩物啦；最後，當然唔可以錯過啲椰皇肉啦，因為燉到軟透晒，輕易就刮到出嚟，大片大片咁放入口，清甜軟熟，食得夠爽。

好多人嚟「蓮香樓」都喺感受番嗰份情懷，而是夜所見，絕大多數客人都喺外國客，嚟得多多少少喺慕名而來啦！

個人評分
味道：8/10
環境：8/10
服務：8/10
抵食：8/10
平均每人消費：HK$200

餐廳資料：
蓮香樓 Lin Heung Lau
地址：中環威靈頓街160-164號地舖
電話：2116 0670 / 3491 5855