陳儀興潮州小館：啟德新風「潮」

死佬老友話未入過啟德，所以，今晚就入去食餐飯，反正大家都住晌屯馬線，過嚟都好方便，此外，亦知道呢度有好多食肆，真喺咩都有得食，而且，不乏知名小店。小弟算入過嚟食過好幾次飯，今晚嚟到，真喺覺得人氣咗，算得上人來人往，而最後揀咗「陳儀興潮州小館」，皆因老友想食吓潮州菜。

餐廳雖位於啟德，但極近宋皇臺站嗰邊，上到地面行幾分鐘就到。餐廳呈長形，裝修簡約，樓底都稍微高，加上夠光猛，所以，感覺都幾唔錯。有卡位、方枱、圓枱，適合唔同組合嘅人士。估唔到今日只喺閒日晚,，竟然座無虛席。

鹹酸菜
有理無理，坐低就放碟潮州前菜名物「鹹酸菜」，入口爽口，味道微微酸，好醒胃，無過鹹。鹹酸菜就免費，只收茗茶$10位，另有加一服務費。

打開餐牌，有一頁喺餐廳介紹，原來店家始劊於1963，已有超過60多年歷史，作為一間食肆走過咁多個年頭，實在唔容易。

餐牌就好大本，選擇非常之多，但有啲難影，好在門口有啲單張攞，貼出嚟俾大家參考，對照過主餐牌，主餐牌會仲有多啲嘢食。

餐廳就無咩太多優惠嘢或超值套餐之類，只喺有一款沙窩翅餐（4位用），以及一系列大廚推介菜式，有唔少都幾啱我哋心水。

香煎韭菜粿 $40

先登場嚟一份潮式點心，一客3件剛剛好3個人分，個外觀睇落唔喺咁靚仔，但絕對喺內在美，外皮咬落先喺好脆口，細嚼煙煙韌韌，而裡面塞滿韭菜，既軟熟，又有陣陣韭菜香，好食！

懷舊炸脆皮大腸 $108
同枱只有死佬，對食喺百無禁忌，所以，一致舉手要試呢一道邪惡之腸。大腸開邊，炸得紅噹噹，咬落勁喺脆卜卜，難得更無油膩感，亦無任何豬燥味，沾上甜酸醬更具風味，伴碟有少少水蜜桃，好睇之餘，又可以當喺間吓場。

炸蠔餅 $78
一不離二，所以，繼續再邪惡，就要了潮菜經典之一炸蠔餅。蠔餅炸至金黃，睇都睇得見好多蠔肉，因為即叫即炸，非常熱焫，入口真心香脆，同樣唔油膩，裡面混和唔少蠔仔肉，飽滿肥美，有蠔鮮味，沾上白醋，更突出蠔味。

滷水鵝件 $135
滷水喺潮州菜嘅經典，點可以錯過，滷水鵝單睇外觀已經非常誘人，鵝件堆得滿滿，確喺份量十足。滷水醇香沉實又入味，果然喺老店嘅手勢，食落鵝肉好嫩口，又不失陣陣鵝肉香味，更有少少油脂香；墊底嘅滷水豆腐，口感滑溜，有豆香，同樣滲出醇香滷水味。

砵仔焗魚腸 $80
呢道懷舊菜少見又少食，功夫多好少餐廳做，既然遇上，老死異口同聲都話一定要叫。一大砵淨喺賣相都已經好吸引啦，一面烘得金黃，入口表面喺脆脆哋嘅焗蛋，裡面喺好嫩滑嘅蛋漿同魚腸，魚腸食落無咩腥味，反而有啲甘腴嘅香味。

方魚肉碎粥 $65

由於嗌咗蠔餅，所以，就無叫蠔仔肉粹粥，反而想食方魚肉碎粥，有一碗或一窩份量嘅選擇，雖然叫一碗咋，點知原來好大碗，以一般飯碗計，足足可以裝到4-5碗。潮州粥又喺有其獨特性，粥底唔會太綿，但米粒亦爆晒花，食起嚟有粒粒感，而加入咗方魚、肉碎，湯頭香甜，食味豐富，更有份好似柴魚嘅香味。

總體而言，老店環境舒服，招呼好唔錯，啲侍應都好快手快腳，屹立咗60多年，食得出其實力，不失老字號之名，今晚所試到嘅菜式，一啲都唔失禮，確有水準，師傅啲手藝紮實，絕唔喺花拳繡腿，值得支持！

個人評分
味道：9/10
環境：8/10
服務：9/10
抵食：9/10
平均每人消費：HK$180

餐廳資料：
陳儀興潮州小館
地址：九龍城啟德沐和街2號啟悅苑零售大樓地下1-3號舖
電話：6927 3138