Cake²：一馬當先

唔覺唔覺，原來唔夠一個月就到農曆新年，中國人當然比較重視農曆年啦。不過，香港喺個中西合璧之地，賀新歲又唔一定只得中式嘅年糕、煎堆、角仔……之類，西式嘅蛋糕一樣可以好應景，最近就晌「Cake²」睇到呢一款「馬仔」立體蛋糕，正正夾到2026丙午年嘅新肖「馬年」。

透明膠盒，結上絲帶，包裝精美，個蛋糕都幾大個，真正嘅高頭大馬，定價$588，足1.5磅重，所以，拎起嚟都幾墜手。最緊要喺做得維肖維妙，而且，樣子可愛。

海綿蛋糕可以揀原味、朱古力、咖啡或班蘭（+ $30/ 磅），餡料方面則可選鮮雜果、芒果、士多啤梨、朱古力軟心（脆脆）、黑森林、紅豆粒、栗子蓉、伯爵茶或柚子慕絲，亦可揀雙併（+ $30/ 磅），小弟就揀咗咖啡海綿蛋糕拼栗子蓉餡心。

海綿蛋糕非常之軟熟，回彈力高，滿滿咖啡香，而栗子蓉餡亦入口清甜柔滑，至於外層嘅咖啡忌廉亦打得柔滑細緻，而且，亦無一般忌廉食落咁膩，此外，唧花已廉忌除咗咖啡口味，粉紅色嘅喺士多啤梨口味，味道亦唔錯；其他裝飾都可入口，都喺用朱古力製作，軟滑可口。

大家不妨諗諗團年飯加個肖馬蛋糕作飯後甜點，取其意頭新一年事事馬到功成，如果有朋友喺屬馬嘅，更可以趁機訂番個作生日蛋糕喔！

個人評分
味道：9/10
環境：-/10
服務：8/10
抵食：9/10
平均每人消費：HK$50

餐廳資料：
Cake²
電話：2947 7575 / 6971 0038 (WhatsApp)