銀龍茶餐廳 Ngan Lung Restaurant：踩單車嘅日常

繼早前趁好天氣同一班舊同事嚟到「塱原自然生態公園」逛逛，之後再晌上水搵食，今次就同朋友踩單車，由大埔出發，踩到水渠附近就落雨，所以，就喺寶石湖邨搵間餐廳打躉避雨兼食過晏晝，而呢個位唔喺「銀龍」就「百分百」，因為方便睇住啲單車，就揀咗前者。

原來呢間分店都好大，正門一入就喺主要嘅用餐區，裡面有大量卡位，啲間板加咗塊磨砂玻璃，唔會同隔離卡位你眼望我眼，感覺好好多。

而再入啲轉彎帶有個房仔，喺另一個用餐區，裡面亦都好大，拍成好多長枱，啱晒一大班人。

雖然嚟食嘅時候喺午餐時段，餐廳都有好多午市套餐，不過我哋仲要踩返去大埔，所以，就選擇比較輕量少少嘅常餐。

常餐C. 鮮茄濃湯吉列豬扒稻庭烏冬 $55

老友就喜歡蕃茄濃湯同埋食啲吉列嘢，所以，呢個配搭就最啱佢，佢就話個湯確喺幾濃郁，滿滿蕃茄嘅酸香，味道好醒胃，而烏冬都好滑溜，炸豬扒大大塊，炸得金黃，入口香脆而不膩，整體嚟講一啲唔失禮。

常餐A. 沙嗲牛肉麵配火腿奄列及法國牛角酥 $50

小弟就例牌揀個有沙嗲牛麵嘅常餐，仲配埋份奄列，特別在於唔喺普通牛油餐包，而喺牛角酥。份火眼奄列都幾大份，火腿亦落得唔少，啲蛋都嫩滑，而牛角酥睇樣就幾靚仔，咬落鬆脆度還可以，但就唔夠牛油香。公仔麵煮得啱啱好，唔過腍就收貨喇，牛肉同沙嗲麵俾唔少，牛肉腍滑，沙嗲夠惹味。

熱奶茶

印象中對上一次飲銀龍嘅奶茶，感覺好似一般般，嫌佢落奶偏多，但今次個師傅手勢好啲，個茶底幾夠濃，幽香，茶奶比例亦都合我心水，口感方面，亦都夠順滑。

食完再抖抖，而個常餐大概七成幾飽，跟住再踩返去大埔都唔會覺得太辛苦。

個人評分
味道：8/10
環境：7/10
服務：7/10
抵食：8/10
平均每人消費：HK$50

餐廳資料：
銀龍茶餐廳 Ngan Lung Restaurant
地址：上水寶石湖邨碧玉樓地下1號舖
電話：2711 2981