HIKARI：奇遇多多生日飯

老婆請我食生日飯，篩選咗幾間小店俾我揀，都喺荃灣區，方便睇完早場後去食。最後，揀咗「HIKARI」，其實都無咩特別，只喺隨心。

餐廳裝修好簡約，無咩花巧嘢，簡簡單單嘅水泥地，木餐枱，喺樓底高，所以，空間感強。由於我哋睇完早場就過嚟，12:00pm都未夠，但坐多陣到放飯時間，就坐到滿滿。

晌門口放咗個散點餐牌出嚟，影低佢俾大家參考吓。分類就分為Day Main, Light Menu, Dessert同飲品餐牌。

相對抵啲嘅，就喺啲1人餐，睇落午餐、晚餐都喺呢個餐牌，包咗主食+ 前菜/甜品 +飲品，雖然話$168起，但好多都要額外加錢，而餐飲包$42飲品，高過就補差價。

橄欖油蒜味墨魚 +$18

原隻墨魚燒香之後，灑咗啲七味粉，賣相幾有睇頭，而橄欖油蒜味其實喺煮熱嘅橄欖油加咗蒜粒，故此，先淨食啲墨魚，品嚐吓啲鮮味，再重手沾滿啲蒜油，會更惹味，而墨魚口感柔韌，幾唔錯。

三文魚籽醬油漬蟹肉忌廉汁意大利麵 +$28

主食方面，小弟揀咗一份意大利麵，面頭放咗好大量三文治魚籽，特別在於以醬油漬過，鹹鮮味以外多份醬油香；此外，滿滿嘅忌廉汁啱晒我，意大利麵又煮得啱啱好，咬口又掛汁，食落蟹肉唔算好多，又比較細梳，有啲食咗都唔覺嘅感覺，內裡仲有啲菇菌同露筍仔，有啲蔬菜令整道菜平衡啲。

油封法式鴨胸意大利飯 +$28

成日都話，要測試吓師傅手勢，點意大利飯呢一類就最能做到，呢碟意大利飯煮得有板有眼，飯粒具咬口感，喺嫌醬汁偏少，濕潤感略遜一籌；至於件鴨胸就煎封得恰到好處，外皮香脆不膩，鴨胸肉好嫩口，又有鴨胸獨特嘅香味。

髒髒提拉米蘇 +$28
有別傳統嘅提拉米蘇，呢一碟提拉米蘇就簡單墊上3條意大利手指餅，再加上大量馬卡風芝士上面，做到髒髒效果就喺灑上大量Oreo餅碎、唂咕粉同唧上朱古力漿，故此重重嘅朱古力味，而手指餅喺無酒版本，帶微微濕潤，芝士都幾軟滑，但有一陣陣怪味，似似哋檸檬味，跟咖啡同朱古力唔太夾。

鮮奶咖啡

兩杯餐飲專登要求後上，襯番個甜點。杯鮮奶咖啡一嚟到，真喺要讚一讚，個拉花絕對拉得出色，唔單止表面平滑，花紋線條細緻，更喺好對稱；口感入口均勻，咖啡味醇和芳香，確實好好飲，基本都無咩挑剔位。

熱朱古力

老婆杯朱古力亦有驚喜，但只限於個拉花，個拉花拉咗隻飛馬，實在漂亮，不過，飲落老婆就話雖然色澤夠深，感覺對辦，但啲朱古力味無預期想像般濃，可能要拉花關係，需要用唔少奶泡去撞，所以，偏多奶嘅情況下就減弱咗朱古力味嘅濃郁度。

因為左加右加，$168梗喺落唔到樓啦，加埋一平均$250一位，以呢個價位晌荃灣區有更多、更好嘅選擇，而服務喺唔錯嘅，侍應都好有禮貌，不過，初段人手就真喺唔太夠，好難搵到個侍應落單，出餐又比較耐，主菜出完一個，另一個要等超過15min先嚟。此外，仲有段小插曲，就喺埋單時先告之壞卡機，亦無其他電子支付，只收現金，好在老婆大人身懷巨款，否則都幾尷尬！

個人評分
味道：7/10
環境：7/10
服務：7/10
抵食：7/10
平均每人消費：HK$250

餐廳資料：
HIKARI
地址：荃灣大壩街21號地舖
電話：9699 9085