宜家家居餐廳及咖啡室 IKEA Restaurant & Cafe：「宜」家搵食唔艱難

老婆想買啲家居裝飾物，如掛畫、盆栽……等等，所以，就過嚟「宜家」睇睇，並順道晌樓上嘅餐廳食埋午餐，雖然開咗咁耐，除咗熱狗，小弟又真喺未幫襯過佢間餐廳喎。

IKEA一向奉行簡約主義，所以，餐廳嘅裝修都好簡約，帶少少北歐風，而且，地方確實幾大，裡面有好多個用餐區。

嚟過都知，呢度採用自助形式，排住隊一路晌唔同位置拎嘢食，去到尾晌收銀位睇你拎乜就計數。

如果要飲嘢，除咗凍櫃啲枝裝飲品外，仲可以去到收銀位前攞隻杯，再到自助水吧自己斟，更喺免費添飲，但就只限汽水、啡茶，卻只收你$9杯咋。

除咗門口嘅電子屏幕顯示出食物外，都有兩張餐牌，所以，照樣影出嚟俾大家參考吓。

講明自助形式，當然，餐具都要自取啦，正正就放晌收銀後尾尾嘅位置，可以講由攞嘢食，到俾錢，再拎餐具，喺幾順手。

頭一輪，攞咗3款食物，加一杯熱茶、一杯咖啡，之後再睇吓食咩甜品好。

脆炸雞全翼 $16
一客有兩隻，炸得比較有啲深色，但又未算燶嘅，還好嘅喺炸得確喺脆口，幾甘香，啲肉都幾嫩滑，但個人覺得有少少油膩。

香草醃三文魚沙律 $36

如果有去開超市買啲煙三文魚就知都幾貴吓，而呢份沙律就有兩大片醃三文魚，啲三文魚幾油潤 ，又有清新香草味，並且伴上少少清爽嘅沙律菜，幾十蚊碟，真唔錯。

瑞典肉丸 $29

瑞典肉丸喺IKEA嘅招牌菜式，我哋就揀咗10粒份量，仲有埋薯蓉及雜菜並配上忌廉汁，只喺賣29蚊堅喺抵食，而啲肉丸幾鬆化，沾上忌廉汁味道唔錯。

咖啡、熱茶 @$9

咖啡都喺以機沖，飲落無咩特別，唔算好高質，亦唔太差，9蚊一杯，仲要免費添飲，你仲想點！而老婆要咗杯綠茶，其實佢都喺俾個茶包你 ，所以，心理上感覺飲汽水同咖啡抵啲。

葡撻 $9.9、藍莓紅莓芝士餅 $23

跟住再追加兩款甜品，前者食落一般般，撻殼比較散，似喺牛油皮，但一咬就碎開，面頭又少咗 葡撻常見嘅燶面，故此少咗啲焦香感，還好嘅喺蛋漿軟熟有蛋香；至於個芝士餅就好食好多，一來芝士餡做得挺身而軟滑，面頭睇到睇到加入有好多藍莓及紅莓果蓉，餅面再加咗層類似金寶嘅碎碎，令到整體口感更加豐富，味道更多元。

無論喺唔喺嚟睇傢俬，都可以上嚟食吓嘢，一來地方大，二來啲嘢食定價真喺平，質素又唔差，所以，見到客人不斷，一枱離開，又有另一枱坐低。

個人評分
味道：8/10
環境：8/10
服務：7/10
抵食：9/10
平均每人消費：HK$66

餐廳資料：
宜家家居餐廳及咖啡室 IKEA Restaurant & Cafe
地址：荃灣青山公路 - 荃灣段388號8咪半7樓
電話：3125 0888