譚仔三哥米線 TamJai SamGor：「譚」何容易，就咁搞掂！

因為近日要執屋，家裏有好多雜物要處理，所以，兩公婆都爭取時間，費事煮，落街食，除咗幫襯 快餐店、茶記，因為都好耐無嚟過食「譚仔」，所以，今晚就快閃幫襯吓佢，食碗粉麵！

環境就唔多講，間間「譚仔」都一樣，最緊要乾淨企理。

自行掃二維碼落單，大家都習慣晒。叫得快閃，梗喺食啲最就手嘅套餐，晌枱面上就見到呢一款晚市套餐，原價$75，依家特價$54，包一款雞肉墨丸豆卜米線，再配一款小食，加一杯餐飲，當然可以加錢額外加餸同小食。

我哋兩公婆都唔諗，就喺食呢個套餐，不過一個揀米線，一個要米粉，小食方面，選咗一客土匪雞翼，一客素菜卷串燒。

土匪雞翼

老婆向來都鍾意食雞翼，所以，小食就揀佢，剛好一人食一隻，啲雞翼都燒得外皮幾卜卜脆，糝咗啲孜然粉，有陣陣香味，燒得啱啱好，雞翼都算嫩滑。

素菜卷串燒

呢個串燒卷其實喺將腐皮包住好多野菜，咬落幾香口，腐皮又脆脆哋，裏面填滿多款野菜，食落又算幾清爽身喎！

清湯雞肉墨丸豆卜米線
「譚仔」啲米線向來份量十足，睇相就知呢碗一樣，而餸料都同樣好足秤。雞肉幾嫩滑，墨丸亦有墨魚香味，豆卜唔油膩有豆香，米線貪得意揀咗硬身，食落確喺有少少韌，下次都喺揀番正正常常， 而湯頭亦算清甜，收呢個價真喺抵食。

熱檸茶、熱檸水

今勻餐飲就簡單啲，無揀到奶茶、咖啡，反而想開開胃啲，揀咗杯熱檸茶，茶底都OK，幾幽香，啲檸檬又無澀味，所以都收貨喇。

都話咗喺快閃，所以，食完就埋單，前後都喺廿分鐘搞掂，哈哈！

個人評分
味道：7/10
環境：7/10
服務：8/10
抵食：9/10
平均每人消費：HK$54

餐廳資料：
譚仔三哥米線 TamJai SamGor
地址：美孚美孚新邨第七期萬事達廣場1樓N84B及N85號舖
電話：2370 9772