新港宴會廳：「港」求抵食

一班好弟兄約埋飲餐茶，其實無咩特別，只喺聚一聚，飲茶可以慢慢磨，傾吓偈而已。所以，近近哋，嚟到屬街坊酒樓嘅「新港宴會廳」，呢度屬舊派酒樓，客人偏向上年紀嘅街坊，我哋呢枱絕對喺拉番低個平均年齡，哈哈！

話就話呢間屬於街坊酒樓，亦開咗好一段時間，但喺個大堂樓底超高，就算拍滿枱，都仍然唔覺會話太逼，加上今日客人唔算多，所以，坐起嚟比較鬆動。

同枱老友食嘢無乜要求，所以，我哋簡簡單單就咁晌張點心紙度瞄準啲孖寶嚟揀，抵啲嘛。茶位收$10一位，需加一！

蒜香蝦春卷（孖寶價）

香口點心一向有市場，大多數人都鍾意食。春卷外皮炸得甘香又脆口，無太多油膩感，裡面混有唔少蝦肉，食落有少少蒜香味，沾上少少喼汁去膩，效果更好。

蟹籽燒賣皇（孖寶價）

燒賣皇做得有板有眼，面頭放咗少少蟹籽，老實講，食味跟放唔放蟹籽小弟覺得分別唔太大，反而，豬肉餡唔太肥，又搓得幾鬆化，食得出唔喺溝粉貨。

原籠馬拉糕（孖寶價）

點心中馬拉糕算喺經典之一，雖然唔喺話必食嘅點心，但我都好想食。睇到馬拉糕中嘅氣泡就知蒸得好鬆軟，食落果然唔錯，入口又好有黃糖嘅香味，當然，亦唔可以講有咩驚喜。

香茜牛肉腸（孖寶價）

腸粉相信喺嚟得飲茶嘅人都會必點菜式，孖寶中只有香茜牛肉腸可選，腸粉皮拉得較厚，不過，餡料就落得好足，一啲都無手緊，加咗芫荽，更添一份清香味。

鴛鴦腸飯 $58

最後，一班男人梗喺要有啲熱飯落肚，既然秋冬天，整碟鴛鴦腸飯算喺另一種男人的浪漫。臘腸、潤腸鋪滿整個碟面，味道唔錯，油潤甘腴，真喺膽固醇萬歲，如果有老婆在場就唔叫得呢類碟頭喇。

今餐飯就唔志在味道，所以，大家都食得隨便，但求有個靜侷少少地方傾吓偈而已。服務方面，大體OK，可能今次客人唔算多，我哋又算嚟得晏，所以，人手招呼都可以，啲侍應都有禮貌。

個人評分
味道：7/10
環境：8/10
服務：8/10
抵食：9/10
平均每人消費：HK$55

餐廳資料：
新港宴會廳
地址：葵涌和宜合道33號雍雅軒地舖
電話：2496 8068