民華餐廳 Man Wah Restaurant：速食「民」化

平常入嚟東涌食嘢通常都喺行完山，食個下午茶，但今次就參家活動，放飯時間就嚟逸東呢邊食個午飯，眼見呢家民華門外有啲人排，但又唔算多，啲客又快上快落，晌度搵食應該幾穩陣。

裡面一來地方唔大，二來一張枱貼弓張枱，加上坐滿人，所以，感覺喺幾擠迫。不過，我哋純粹醫肚，快閃食一餐，所以，環境唔喺我哋要考慮嘅因素，最緊要喺啲嘢食OK。

晌門口排隊時已睇定食乜，目標當然落喺啲精選特色飯類，此外，仲有好多碟頭飯餐供選擇，但就唔見有午餐。溫馨提示一吓，好多嘢所標示嘅價錢喺唔包嘢飲，加配熱飲要$11，凍飲要$14，所以，計起嚟就比市區嗌同樣碟頭要貴15-20%左右。

叉燒炒滑蛋飯 $55

呢道啲叉燒系碟頭確喺做得唔錯，好似朋友呢碟，啲滑蛋炒到金黃嫩滑，佢就話口感一流，而且，好有蛋香味，叉燒部分等陣小弟先講，再者佢哋啲碟頭好大，飯量十分多。

招牌叉燒煎蛋飯 $49

而小弟呢碟招牌不愧為招牌，啲叉燒真喺燒得好靚仔，而且，喺瘦叉嚟，比較啱我，咬落非常之 鬆化，唔會柴皮咁，加上有啲燶邊，好食，所以，怪不得知有咁多街坊幫襯，而煎蛋煎得啱啱好，蛋黃仲喺流心嘅，加埋豉油撈飯一流。

熱奶茶 $11

大家都喺識嘆之人，所以，齊齊揀返杯熱奶茶，不過，個人口味嚟講，茶色就欠少少光澤，比較淡口，其實茶底都還可以，但就覺得喺奶量少少偏多。

幫襯時正直飯市高峰期，真喺一枱接一枱，全無間斷。單純講食物質素，「民華」佢喺有水準，但打算坐耐少少就唔太方便，雖然店員就無話叫你埋單離座，但地方比較迫，環境比較嘈，所以，目測所見絕大部分客人都喺食完即走。

個人評分
味道：8/10
環境：6/10
服務：7/10
抵食：8/10
平均每人消費：HK$49

餐廳資料：
民華餐廳 Man Wah Restaurant
地址：東涌富東街6號富東廣場地下21號舖
電話：2866 1827