Pinky Bakery：滋味好「冬」西

過到嚟上環嘅海港政府合署搞啲文件，返公司途中經過IFC，睇見呢一家主打賣冬甩嘅新店「Pinky Bakery」好吸引，之前晌銅鑼灣就過佢哋嘅Pop-Up Store。咁就不如買啲返去跟同事一齊下午茶，當喺慰勞吓大家早排搞掂幾個項目。

店舖細細一眼睇晒，兩組餅櫃就顯示晒所有烘焙產品，一排排整齊排列，加上燈效，頗為吸晴。當中包括有冬甩、迷你冬甩、貝果包、酸種麵包、牛角酥……等等，望上去確喺非常吸引。難得依家仲有買3送1優惠嘛！

紙盒包裝，剛剛好裝到4個大冬甩，盒面除咗有店名、招牌妹妹個樣之外，晌盒邊更印有店家產品嘅特點：新鮮人手製作、無添加、無防腐、天然食材、本地香料，以及採用日本麵粉。所以，食得健康之餘，更有份信心晌度。

朱古力花生醬冬甩 $48

冬甩外層有近一半沾上黑朱古力漿，仲黐咗少少花生粒，咬落去朱古力味都好香濃，而裡面嘅花生牛油醬軟漿好軟滑，滿滿花生香，又無過甜嘅問題。

咖啡冬甩 $48

睇樣就平平無奇，不過，佢哋啲冬甩咬落去真喺好軟熟，撳落去回彈力十足，而裡面超過一半空間都喺咖啡漿，口感滑溜，好醇香咖啡味，襯杯咖啡真喺一流。

抹茶冬甩 $48

呢個好搞笑，晌個唧漿嘅窿位塞咗粒QQ嘅麻薯，純粹都喺方便做個印記。裡面同樣填滿抹茶軟漿，嗰陣抹茶味非常之濃郁幽香，絕對喺抹茶控嘅最佳之選。

海鹽焦糖冬甩 $48

講到賣相，應該最突出就喺呢一款海鹽焦糖冬甩，成個冬甩面面鋪咗一層焦糖鏡面，閃閃爧，可能天氣凍，咬落去脆得嚟有少許硬，而裡面嘅焦糖軟漿就好正。

雖然賣到$48一件確喺唔平，但作為一件高質素嘅西式甜點，又唔可以話貴，最緊要喺大家食得開心，大家又好欣賞。

個人評分
味道：8/10
環境：7/10
服務：9/10
抵食：7/10
平均每人消費：HK$48

餐廳資料：
Pinky Bakery
地址：中環金融街8號國際金融中心商場1樓1041-1049號舖
電話：Nil