冬至晚飯全包宴分幾個價錢：$3,688、$4,188、$4,888，預先落訂金仲每席減$500，半席就減$200，講明全包宴咁就梗係包茶芥加一，仲附送大支啤酒兩支及汽水六罐。我同老婆就坐晌半席嗰邊，所以餸菜份量喺減半。
上湯焗蝦球伊麵
鴻運乳豬大拼盤個人而言，俾我都寧願揀大拼盤好過乳豬全體，有多啲唔同嘢食嘛！個拼盤除咗有乳豬，仲有海蜇、燻蹄、燒鴨同叉燒，質素就唔講得話好好，但至少唔差。
碧綠金錢鮑螺片雖然唔喺鮑魚片，但啲螺片都炆得好夠腍，咬落柔韌有咬口，而大大隻嘅花菇好厚肉，口感軟腍有菇香，用料唔失禮，底下仲有墊有唔少生菜。
沙律盞天婦羅蝦睇名好似好勁，不過，上到枱就雞啲，一來所謂沙律盞其實只不過一碗仔沙律菜淋上胡麻醬，二來對比碟伊麵嘅蝦球，啲天婦羅蝦真喺奀啲，咬落去變咗一半喺蝦肉，一半喺粉漿，還好嘅喺唔太油。
碧綠花姿蘭花蚌鮑螺片嘅「碧綠」喺生菜，呢碟嘅「碧綠」就喺西芹，仲搭咗少少燈籠椒，加埋鮮魷同蘭花蚌炒埋一碟，清清哋都幾好食。
金湯海皇燴燕窩小弟戒食魚翅，但好多時啲酒席、全包宴大多數都有翅，不過，今晚呢一道湯水就更啱我。老實講，面頭好似就一層層燕窩，但就真喺唔喺好食得出，海皇料亦唔見得多，但個湯頭確喺幾清甜。
清蒸沙巴龍躉正所謂年年有餘，蒸魚菜式喺指定菜式，睇落已經覺得好夠斤兩，食新鮮魚清煎就最好不過啦，搭埋少少蔥絲，火喉又算啱啱好，肉質都頗嫩滑，又有魚鮮味。
富軒脆皮燒雞全包宴去到尾聲，燒雞又喺另一指定雞作，我哋喺半圍，所以得半隻，但斬得好，砌番晒個形出嚟。外皮金黃香脆，咬落肉質嫩滑，一啲都唔失禮。
生炒臘味糯米飯老實講，依家都好少機會食到真正嘅「生炒」，都喺煲好啲糯米飯作後期加工炒出嚟。啲飯煙煙韌韌，但就無一種炒到好爽身嘅感覺，還好臘味料都好多，食味唔錯。
大師糕點其實就喺杞子粟米桂花糕，晶瑩剔透嘅桂花糕，糕身好清爽，確有陣陣桂花香味，加咗杞子、粟米粒，就增加多咗少少口感。
其實我呢班親戚對食要求唔高，志在過時過節聚一聚。招呼方面，雖然今晚（第一輪）好旺，但啲侍應嘅招呼都算唔錯，上菜嘅速度亦都OK，雖然次序都喺隨意架喇，但起碼唔會急一輪又無嘢到，枕住都有餸菜上枱，最緊要都喺一班長輩食得開心。
個人評分
味道：7/10
環境：7/10
服務：7/10
抵食：8/10
平均每人消費：HK$265
味道：7/10
環境：7/10
服務：7/10
抵食：8/10
平均每人消費：HK$265
餐廳資料：
富軒 Wealthy Garden
地址：長沙灣青山道164-170號宇宙商場1樓
電話：28310013
富軒 Wealthy Garden
地址：長沙灣青山道164-170號宇宙商場1樓
電話：28310013
沒有留言:
發佈留言