山區裡的走走趯趯: 米子燒肉家 Komeya：點「子」燒肉咁簡單

2024年12月18日星期三

米子燒肉家 Komeya：點「子」燒肉咁簡單

依家啲「冬菇亭」食肆賣少見少，尤其啲舊邨重建，就基本上會消失。繼早前行完山經過「隆亨邨」嘅「冬菇亭」，就幫襯過吓，今晚同老友記嚟到「美林邨」嘅「冬菇亭」搵食，喺在地嘅朋友推介呢間「米子」，食日式燒肉又得，食港式雞鍋又得。

呢度有3間冬菇亭食肆，數到最搶眼肯定喺「米子」，因為門面採用粉紅色，加埋燈效，仲要晌頭位，所以，好易認到。走進店內，亦喺一室以粉紅為主調，若非枱上有日式燒肉嘅烤爐，真喺估佢唔到喺賣日式燒肉。

但不得不講，啲位寧舍闊落好坐，更有部份卡位設計成可以坐成12人，如果無咁多人，又可以以竹簾間開兩邊。

此外，晌部份大梳化旁設置一啲大籃，方便客人擺嘢。

所謂工欲善其事，必先利其器，喺枱面嘅一旁已經放齊晒所有食烤肉時用到嘅調味料，例如，柚子醬、燒汁、辣醬、七味粉……等等，枱上亦放好所有用具，另外枱邊有個暗格，就擺咗紙巾、糖包、鹽包，自由取用。而烤爐採用下抽風式，感覺抽力都幾夠強，燒咗成晚，都唔會覺得好大油煙味。

食物選擇方面，當然喺以日式燒肉為主打啦，燒肉定食一共有6款，分兩個份量，定價由$66-$238，可謂豐儉由人，仲包埋麵豉湯、海鮮盛盒、生菜及日式冷麵或珍珠飯，不得不讚仲要免收服務費，所以，到訪當日見到幾多年青人幫襯。

唔想太花時間食燒肉，佢哋仲有多款丼飯：牛肉、燒雞、炙燒豚肉及鰻魚，定價亦相宜，都喺$64-$92，包埋泡菜及一杯冷泡茶，而且，亦標明採用日本上等珍珠米，絕對喺有誠意。

最估唔到，仲有供應一啲火鍋套餐，呢啲就啱晒香港人，套餐共有3款：椰子雞鍋、胡椒豬肚雞鍋、藥膳花彫藥材雞鍋，配埋和風蟹肉炒飯及火鍋配料一份，都只喺賣$198，抵食喎。如果純粹試個雞鍋，亦可以單點架，有半隻及一隻份量揀。

除咗上述嘅燒肉定、丼飯套餐、雞鍋之外，仲有啲料理小食、沙律、汽水、啤酒供應，想食得豐富啲，不妨考慮追加三幾款。

我聽到好似有放題供應，不過，無深究，但晌出面有個自助區，放咗啲冷泡茶、熱茶，麵豉湯、啫喱同糖水，任意享用。順便講講，啲麵豉湯唔錯喎，除有昆布，裡面仲有好多清甜嘅蘿蔔。仲有，自助區仲有埋火鍋豉油、芫荽、蒜蓉、辣椒比大家食火鍋時使用！

豚三國王樣定食（150g）$92

燒肉方面，我哋揀咗一份豬、一份牛，介紹吓份豚肉先，包括有伊比利亞豬肉、黑豚肉、豚五花，單喺睇啲色澤，非常鮮潤，感覺好新鮮。我哋都無特別考慮食嘅先後次序，總之一鋪過燒好就食，最喜歡沾柚子醬，去膩感強啲，幾款豚肉食落唔會覺得好肥，但又有油香，確喺好食。順帶一提，啲蕎麥麵亦都好唔錯，幾有蕎麥嘅香氣，咬落去仲帶少少韌勁。

美國燒肉盛盒定食（150g）$102
輪到講吓啲牛，餐牌就只寫住美國特選牛肉三款，而今次所試到嘅喺安格斯板腱、牛五花、牛腿肉，同樣睇落啲色澤好唔錯，鮮豔亮麗，唔會暗啞。因為牛肉比較快熟，焫兩焫就搞掂，所以分開慢慢燒，無論邊一隻肉都好有肉味，油香豐腴，配燒汁一流。此外，啲珍珠飯黏糯軟熟，夾住啲牛肉一齊入口更好味。