山區裡的走走趯趯: 萬麗咖啡室 Cafe Renaissance：「歐」起美味回憶

2024年12月4日星期三

萬麗咖啡室 Cafe Renaissance：「歐」起美味回憶

有幸地，北歐（主要喺挪威）算喺去過一次，不過，已經差不多喺6年前嘅事喇，當時喺一班老友為極光而去，喺一次幾好嘅旅遊體驗。最近就嚟到「萬麗咖啡室」大嘆自助餐，佢哋嘅自助餐一向有水準，而踏入12月就已經開始咗做聖誕加北歐主題「炫彩北歐佳節盛境」，別加入多款北歐菜式。

可能好多人都同我有一樣嘅諗法，就喺提早慶祝聖誕，比起正日食得划算啲。而今晚只喺平日週中，目測都有8成滿，而個場勝在夠大，地方寬敞加上柔和燈光，食物區都喺二字左右排開，集中晌一個範圍，令到整體感覺幾舒服。

由於北歐主題加上聖誕，所以睇到喺佈置上花咗唔少心思，尤其晌甜品、沙律吧上面，更做咗啲極光燈效，其次，晌唔少位置就會見到雪人小擺設。

今次自助餐星期一至四晚計，成人收$910.80（小童收$ 547.80），星期五至日及公眾假期成人收$954.80（小童收$ 569.80），另收10%服務費，晌官網預訂有8折（https://bit.ly/3Yo9x8G），前者折實$745.20，後者折實$781.20，Klook有時仲推出限時搶買一送一，不過，真喺唔夠人咁快手。當然，去到12月24-25日同12月31日除夕就會再貴啲啦，有興趣就自行上網睇睇啦！

冷盤、沙律、芝士盤、麵包籃
先講講冷盤同沙律，就晌食物區嘅頭位，選擇非常多，尤其沙律，好多主題菜式，所以，今晚真喺要集中揀，唔可以乜都試晒，故此，一啲凍切肉腸呀、芝士呀就暫且放棄，瞄準多款特色冷盤同新鮮沙律，例如：煙燻瑞典鯖魚尼斯沙律、北歐沙甸魚薯仔沙律。聽經理講，節日嗰幾場，更加入挪威龍蝦沙律一啲更高檔菜式。

小弟有個慣性，就喺搵啲頭盤開吓胃，所以，將最心水、最精選嘅沙律同冷盤放埋一齊，造就小弟呢碟超豐富頭盤，樣樣都有啲，夠晒多元化，色彩又夠繽紛，睇見都已經好醒神。幾款主題材式嘅沙律都非常之好食，特別推介喺醃製挪威三文魚配Caviar House & Prunier 魚子醬、風乾牛肉、西班牙黑毛豬火腿，真喺令呢碟頭盤升幾級，食完可以講更開胃，等一陣可以食得更多。

冰鎮海鮮

食自助餐最回本嘅一定喺啲冰鎮海鮮啦，餐廳供應5款海鮮，包括：法國麵包蟹、波士頓龍蝦鉗、雪蟹腳、澳洲青口、凍海蝦，佐以幾款醬汁，如雞尾汁、辣椒芫荌汁、紅酒醋，蜜糖蕃茄醬……都幾特別。就目測所見，呢啲回本嘢好搶手，但成晚都見補貨甚快，完全無間斷供應。

小弟都好鍾意食海鮮架，不過，個自助餐實在好多嘢都好吸引，所以，冰鎮海鮮就樣樣拎一件試試。成份海鮮拼盤咁。每一款都有其獨特嘅鮮甜味，麵包蟹爆晒膏，而波士頓龍蝦鉗、雪蟹腳，啲肉勁鮮甜喎，凍海蝦鮮爽彈牙，沾上少少雞尾汁真喺一流，就連青口都食得出唔喺平價貨。

刺身、壽司、卷物

連同冰鎮海鮮，呢幾個大類放晒晌近入門口嘅長枱位置，所以，特別搶眼，包括三文魚、油甘魚、吞拿魚、帶子、八爪魚、鮑片，而壽司有北寄貝、灸燒三文魚、灸燒和牛同甜蝦，加上兩款卷物同迷你魚生丼。

小弟唔喺唔鍾意食刺身、壽司，只不過覺得自助餐所提供嘅一般都喺啲大路貨色，不過，老友就好鍾意食三文魚同壽司，我就黐佢少少試吓。啲刺身果然好新鮮，而佢就話啲壽司唔錯，壽司飯捏得緊致卻唔死實，灸燒和牛壽司有驚喜。

湯品

湯品嘅選擇比較多，除了西式嘅粟米周打湯、中式嘅酸辣湯之外，最亮點莫過於佢哋嘅招牌是日燉湯，名稱就無講，但湯內響螺、淮山、桂圓、排骨，細細盅燉湯放滿料，絕對真材實料無欺場。

食完幾樣生冷嘢，飲啲熱湯暖暖胃，個燉湯確喺夠晒火喉，湯味清甜且濃而不濁；而粟米周打湯亦都唔錯，口感滑溜，有粟米嘅清甜香味。

龍蝦喇沙

晌自助餐裡，通常都有啲即煮粉麵、即煮意大利麵……等等，這裡就以龍蝦做亮點，配馬來風嘅喇沙，真心吸引。故此，攞番一碗同朋友共享，試得到又唔會食得太飽。

麵底可以揀米粉或油麵，食正宗啲就梗喺糝糝啦，即米粉溝油麵。除咗肉質鮮爽嘅龍蝦外，仲有好多配料，而個喇沙湯底真喺好正，香濃微辣，濃稠啱啱好。

越橘醬鴨肝配牛肝菌清湯

未講熱盤類時，先介紹晌食物枱尾嘅特色菜越橘醬鴨肝，煎鴨肝本身都已經喺好矜貴嘅菜式，晌出面單叫一客往往都成嚿水。餐廳專登僻作一個專櫃製作，仲要有落單時先會整，出嚟嘅成品更喺成道單一前菜咁款。

鴨肝煎得香嫩，入口口感綿密有油脂香，加咗啲酸酸甜甜嘅越南柑橘醬，已經好能夠平衡番鴨肝嘅油膩感，再墊上嫩滑嘅豆腐同加入牛肝菌清湯，實在喺美妙嘅組合。

焦點菜式、熱盤盛會

輪到講講熱盤，長長嘅熱盤枱擺放嘅食物琳羅滿目，加上好多焦點菜式、主題菜式……都非常之吸引，包你三心兩意唔知點揀好，概略簡單介紹一下有咩食，包括焦點嘅新鮮蒸焗波士頓龍蝦、印度咖喱、多款北歐主題菜式、聖誕烤火雞、烤帶骨牛肋排、烤西班牙乳豬、丹麥脆皮烤豬腩、丹麥烤鴨……等等，當然顧及本地人口味，仲有啲中式小炒、蒸糯米飯……等等熱盤。