小廚港作 Rocoma Kitchen：「麩」唱婦隨

今日跟姨仔教會參加咗個本地遊，去吓沙頭角，又食吓海鮮餐，逛逛農莊，咁就一日。因為出發地點晌荔枝角，所以，早啲過嚟食咗早餐，睇住時間先行過去集合點。之前就晌網上搵到呢一間茶記「小廚港作」，睇落風評好似幾唔錯，加上就喺集合點就晌對面，夠方便。

裝修就無乜特別㗎喇，不過，餐廳勝在地方大，有大量卡位，枱櫈算拍得唔密，我就幾鍾意佢晌卡位個挨背度加多塊玻璃隔一隔，相信喺疫情時所做嘅設施，變相就好似前後位嘅私隱度大咗。

枱側下嘅櫃桶喺茶記例牌嘅「機關」，擺滿餐具、餐紙、簡單調味料，但值得一讚嘅喺有相你睇，擺得充足之餘又夠整齊企理。

早餐選擇方面，選擇多多，但當然都喺嚟嚟去去晌茶記見慣見熟嘅選項、組合，都喺3、40蚊價位範圍之間，算喺相宜。

D. 自選雙拼麵餐 $37
老婆依家需要轉為無麩質飲食，所以，有埋餐包之類嘅佢都唔揀得，篩吓篩吓，呢個自選麵餐就最啱佢，因為彈性較大。而佢就揀咗榨菜雞絲、煎蛋配米粉，份量都幾十足，大大碗，煎蛋喺雙蛋添，佢都話差啲食唔晒，而湯底亦唔會淡茂茂，一啲都無hea做。

C1. 沙爹牛肉公仔麵餐 $38

我就都喺食番沙嗲牛肉公仔麵餐，因為沙爹牛肉晌茶記裡面喺其中幾穩陣嘅選項，不過今次就唔喺配公仔麵，而喺一種米通粉，我都喺第一次聽，感覺幾特別，佢真喺好似通粉咁，但長身好多，口感少少偏軟身，事後知道呢種米通粉確喺搵米做，非小麥做，下次老婆都可以試；而個沙嗲牛肉做得唔錯，配埋懷舊嘅扭紋餐包同火腿煎蛋，夠晒飽呀。

熱檸水、熱奶茶

輪到餐飲，都喺例牌嘢，佢就要熱檸水，小弟就繼續飲番熱奶茶。呢度嘅熱奶茶個人嚟講就不過不失，入口都芳香，茶奶比例亦OK，但茶底感覺欠缺少少醇厚感。

可能係星期六晨朝早，就算工廠區，依家都唔少喺返5日，所以，食完走人嘅時候，成個場都唔喺好多客。但喺就讓我哋感覺更加輕鬆悠閒，唔會有平時喺茶記食嘢嗰種衝衝衝嘅感覺。

個人評分
味道：8/10
環境：7/10
服務：7/10
抵食：8/10
平均每人消費：HK$38

餐廳資料：
小廚港作 Rocoma Kitchen
地址：荔枝角長沙灣道833號長沙灣廣場地下G01B號舖
電話：3105 0618