Cuisine Culture：商廈大「法」現

喺歐洲幾個大國嘅菜系中，相信法國菜算喺比較少食，睇返自己啲食評，原來對上一次食法國菜已經喺成年前嘅事，今晚嚟到隱身於商廈裡面嘅「Cuisine Culture」，再細嚐法式滋味。

雖然店舖裝修樸實，卻有種小鎮嘅法式小酒館氣氛，加上燈光柔和，感覺蠻舒適服。

而廚房採開放式，睇到廚師們晌裡面做茶嘅情景。順帶一提，招呼幾唔錯，侍應不時主動添水，更換餐具，又會視乎你進食進度而上下一道菜，令整晚進食嘅流程好暢順。

講講餐牌，呢度就無做套餐，全部都喺散點。大類分為前菜、湯品、沙律、主菜、意大利麵及甜品。

而飲品方面，除一般嘅咖啡、茶、果汁之外，有另一本餐牌列出多款紅白餐酒。侍應更話做緊推廣，紅白餐酒買一送一，無論喺嗌一杯或是一整支，都有呢個優惠，啤酒同汽水都喺，買一送一。

龍蝦湯 $92

講到湯品，法式洋蔥湯同法式龍蝦湯相信都可以喺代表之一。龍蝦湯上到枱，色澤已經好對辦，橙紅得嚟好亮麗，入口更喺鮮蝦味濃郁，啖啖精華湧入口腔，附上嘅蒜蓉法包亦烘得脆口，蒜香滿滿。

法式焗蝸牛 $108
焗蝸牛亦喺法國菜頭盤嘅經典，一客共有6隻，墊有少少薯蓉，咪輕看啲薯蓉，除咗搓得軟滑，仲有陣陣香草香；而啲蝸牛肉口感嫩滑，甚具蒜蓉及牛油香味。

慢火煮紅酒和牛面肉配法包 $288

主菜就推薦呢一道牛面肉，因為唔喺經常遇到呢一款菜式，加上以慢煮方式，更能發揮到牛面肉嗰份超鬆化。雖然賣相平實，但牛面肉入口確喺勁軟腍，質感好有一咬即化嘅感覺，而且，肉味濃，陣陣紅酒香氣。汁底亦咪錯過，以法包沾上少少紅酒汁，食味一流。

海鮮墨汁意粉 $208
另一道主菜就揀咗海鮮意大利麵，單睇啲海鮮，就已經覺得好有料到，包括有大虎蝦、帶子及青口，虎蝦非常之彈牙鮮甜，帶子軟滑而帶有陣陣海水鹹鮮味，而啲青口唔喺普通嘅平價貨，食得出嗰份甜味，質感柔軟；意粉亦煮得啱啱好，咬落有柔韌感，做得水準甚高嘅菜式。

酥皮蘋果批配雪糕 $88

最後，點少得一份甜品作結吖，師傅更刻意以碟他畫布，晌上面畫有花朶、彩霞，自然更賞心悅目。酥皮蘋果批烘得金黃，酥皮非常香脆富牛油香，蘋果清甜，更有微微玉桂香，伴以果仁雪糕，一凍一熱，口感對比鮮明，再者，雪糕軟滑富奶香，亦記一功。

因為小弟晌附近做嘢，就問問有無午市餐牌，一張小單張印製晒所有午市套餐，足足有成16款之多，豐儉由人，已包沙律或餐湯，以及基本餐飲，有機會再嚟試試午餐先。

簡單試過數款菜式，食得出製作用心，用料高質，加上環境都幾舒服，無論三幾位知己嚟聚一聚，抑或特別日子嚟慶祝吓，都喺個好唔錯嘅選擇！

個人評分
味道：9/10
環境：8/10
服務：8/10
抵食：8/10
平均每人消費：HK$480

餐廳資料：
Cuisine Culture
地址：中環蘭桂坊德己立街12號業豐大廈2樓203號舖
電話：2608 9191