米線陣 Mixian Sense：港式「早」合

嚟「米線陣」梗喺食米線啦，錯！真喺嚟唔喺食米線，因為今日兩公婆又過嚟荃灣睇早場，先晌荃新天地一期食個早餐，再過去二期睇戲，因為一期呢邊多嘢食，就喺商場內嘅中庭地下就見已經有好幾個選擇，「米線陣」未幫襯過，加上其中有一個系列嘅港式早餐好啱我。

因為餐廳位處商場嘅中庭大堂，而唔喺入舖，所以，空間咁十足，加上其實餐廳佔地都唔細，再者星期六一朝早嘅人流真喺唔多，所以，會感覺更寬敞。

雖然餐具、簡單調味料已經放喺枱上，但喺出面有個櫃枱放咗熱水、餐具，另一邊又有個調味料區嘅櫃枱，自由取用，服務全自助。

上文講過有個系列嘅早餐好啱我，就喺呢一款丹麥多士系列，配搭唔同嘅主食，包餐飲，都喺$38 / $40。

老婆就唔食得多士，不過，都有其他選擇，港式公仔麵餐、醒神早餐、米線自由配早餐，選擇非常有彈性，唔使擔心揀唔到。

炸豬扒煎蛋米粉 $36

最後，佢嘅選項喺炸豬扒搭太陽蛋配米粉，餐飲就揀熱檸水，唔喺講笑，碗米粉非常之大碗，而且，睇得見豬扒亦好大件，煎雙蛋，絕無欺場，而味道亦唔錯喎，豬扒炸得騷脆，並且醃得入味，仲有啲蔬菜墊底，夠均衡。

招牌蕃茄牛肉通粉餐 $40

丹麥多士餐屬於比較典型嘅港式早餐 只係由 一般多士轉咗丹麥多士 小弟就揀咗配 午餐肉 炒滑蛋，主食就要茄牛通。先講啲副食，炒蛋炒得幾滑，而且，好夠份量，睇落有兩隻蛋量，餐肉煎得香口，入口熱焫焫，唔似煎定一大埋攤涼晒，丹麥多士比一般多士自然酥脆更富牛油香。而碗茄牛通唔錯，蕃茄味濃郁，酸香鮮活，味道自然，唔似搵茄膏開嘅貨色，更有唔少蕃茄肉，通粉亦煮得剛好，最怕過腍；啲牛肉都OK，腍滑有肉香。

熱咖啡、熱檸水

呢個喺同老婆幾例牌嘅選擇，因為唔喺茶記，唔知奶茶得唔得，無謂搏，其次，搵手機落單時，見喺即磨咖啡，心想應該穩陣啲。事實上，杯咖啡算唔錯，啲豆幾香，而個人就覺得啲奶偏多咗少少。

今次嚟「米線陣」食早餐真喺有少少意外驚喜，估唔到佢米線以外嘅嘢都做得唔錯，比預期好。此外，餐廳位處商場嘅中庭廣場，地方闊落，空間感強，加上呢度嚟戲院近，我哋可以睇住時間慢慢食。

個人評分
味道：9/10
環境：8/10
服務：7/10
抵食：9/10
平均每人消費：HK$38

餐廳資料：
米線陣 Mixian Sense
地址：荃灣楊屋道1號荃新天地地下FC1-2號舖
電話：2476 1198