金叔叔 Uncle Kim：分「金」同味

約咗個舊同學傾下工作嘢，因為大家算喺同行，互相交流。由於佢晌觀塘區工作，所以，地點由佢發辦。佢就話不如去「愛琴坊」呢個美食廣場啦，到時可以睇下揀想食乜，結果，就揀咗「金叔叔」，我就同佢講正正十月尾就計劃咗去首爾 hea遊。

上文都講咗呢個喺美食廣場，晌門口位就見到裡面有6間餐廳，地方都幾大，間咗兩大個區域，感覺都幾闊落，加上「金叔叔」呢邊以黃色做主調，睇上去非常之搶眼醒目。

拎張餐牌埋位慢慢睇，晚餐包汽水及細份小食或前菜，大類分咗便當系列、無骨炸雞系列、石鍋飯系列、韓Soup系列、傳統韓風系列、拌飯系列，晌出面櫃枱落完單，食物就會由店員送上。

雖然我哋兩個各有各點，不過，嚟到當然喺「些牙」食啦， 試吓多啲嘢嘛！

大豆芽、菠菜（跟餐）
想食得健康少少，無揀小食，揀咗兩個都喺前菜，分別喺大豆芽同菠菜，雖然睇落好似普通嘢，但喺韓式嘅前菜向來得有一手，食落感覺都幾清新健康。

板燒牛肉石鍋飯 $85

個石鍋飯賣相掂喎，飯面有非常多餸料，燒牛肉 、大豆芽、菠菜、泡菜、甘筍絲、青瓜絲、煎蛋，最簡單嘅食法就喺撈均晒所有嘢，再加少少韓式甜辣醬，食味一流，又夠營養。

蜂蜜牛油炸雞 $93
碟炸雞亦都做得似模似樣，炸雞件都有唔少，無細數，應該都有超過10件，炸得香脆唔油膩，少少蜂蜜嘅清甜味，又滲出少少牛油香，最好喺無骨啖啖肉，食得夠過癮。

青提子汁、可口可樂（跟餐）

飲品無特別心水，小弟就隨心揀咗罐青提子汁，以前去食放題都飲過，覺得都唔錯，味道喺幾清新，又唔太甜，裡面仲有少少青提子果肉添。

晌美食廣場食嘢有樣好，無乜人理你，咁我哋食完可以慢慢傾，傾到夠皮先散水。

個人評分
味道：8/10
環境：7/10
服務：8/10
抵食：8/10
平均每人消費：HK$90

餐廳資料：
金叔叔 Uncle Kim
地址：觀塘巧明街94-96號鴻圖中心地下5D&E號舖
電話：Nil