ROJO：新推二人餐

有個老友話一直好想試西班牙菜，就為佢揀咗幾間心水嘅，最終決定嚟到炮台山嘅「ROJO」，因為食過好幾次，覺得水準穩定，加上近期發現店家推出咗二人套餐，覺得抵食喎，就扑鎚嚟呢度。

印象中，餐廳嘅環境無乜點大變，一室以黑白灰為主調，摩登時尚，喺多咗好些植物點綴吓！

知道佢哋嘅西班牙小食有好多選擇，主菜亦都唔錯，不過，因為今次主要都喺睇啱佢個二人餐「ROJO Set for 2」，西班牙小食12款中揀5款，主菜就6揀1，不過，要留意部分菜式需要另外加錢，仲包埋一款指定甜品。成個餐折實定價$535，小食方面，似乎加入咗少少亞洲元素，例如 油甘魚、可樂餅、泡菜。

Cool Mint $60、Pineapple Juice $36
近排天氣熱焫焫，所以，我哋都先嗌番杯凍飲。老友就唔飲得酒，所以，揀杯菠蘿汁，而小弟對酒亦興趣不大，就揀呢杯Cool Mint，因為加咗大量薄荷葉，飲落真喺涼透心，下面仲有少少荔枝肉咬下。

黑毛豬火腿、薯仔沙律、蛋黃醬

先嚟一道沙律開胃吓，你可能會話薯仔沙律普通料啦，喺嘅，做得正正常常唔會有咩特別嘢，不過，加咗富油香嘅黑毛豬火腿，立時升咗幾個層次，雖然唔知啲火腿熟成幾多個月，但睇閃爧爧嘅色澤及油脂，已經知喺高質嘢，食落鹹香油潤，肉質柔韌中有細膩。

油甘魚他他配牛油果 +$18

再嚟多一道帶和風嘅開胃菜，將油甘魚切成粒粒，再混入紫洋蔥、紅甜椒、牛油果造成他他塔，賣相非常之精緻，又好有立體感 ，配以香脆嘅百吉包，味道多層次，酸香醒胃，確實唔錯。不過，配多兩片百吉包就仲好！

黑松露芝士風乾火腿比堅尼
名字改得好鬼馬，簡簡單單加入黑松露醬、西班牙軟芝士及風乾火腿，因為用料上乘又十足，堅多黑松露醬，加上麵包刻意用上薄薄嘅方包，仲將包面煎香過，入口時達至焦脆嘅口感，味道鹹香再加黑松露獨特幽香，成件事就變得更正。

炸西班牙蟹肉南瓜可樂餅

簡單嚟講，就喺炸肉丸球，之但喺，用上蟹肉，自然升多一級，雖然唔算話有好重蟹味，但食得到一絲絲蟹肉；仲有，餡心嘅南瓜蓉搓得軟滑粉香，而外層炸到脆而不膩，整體嚟請，仍覺得成唔錯。

西班牙薯仔軟臘肉腸蛋餅
呢個唔使多介紹喇，西班牙蛋餅絕對喺西班牙小食中嘅經典。厚厚嘅蛋餅煎得金黃，份外吸引，啲蛋入口好軟熟嫩滑；內裡填滿好多薯仔粒，更加有軟滑溶透嘅芝士、鹹香嘅西班牙軟臘腸，夠咬口，味道又豐富，令口感、食味都唔單一。

西班牙海鮮飯 +$38

西班牙海鮮飯其中一個大特色就喺「大鑊飯」，飯面鋪滿海鮮食材，包括虎蝦、大蜆、青口、魷魚，加上啲海鮮幾靚，可謂甚有睇頭，而呢個份量，大概可以預2-3人享用。 不單只啲海鮮好有鮮味，飯底加入蕃紅花、海鮮湯去煮，並混入少少豬腩肉，除鮮香之外，更有份鹹香嘅惹味，且入口微微濕潤，飯粒卻好分明，的確好好食。

西班牙玉桂油條、朱古力醬、雪糕
套餐所包嘅甜品喺指定嘅西班牙油條，呢一款甜品亦喺西班牙菜嘅經典。油條炸得金黃，脆而不膩，裡面好軟綿，灑咗唔少玉桂粉，多啲就更好，沾上朱古力漿，再配少少雪糕，份外美味，更有冰火嘅感覺。

再訪ROJO果然夠穩陣，啲食物保持到水準，怪唔之得就算今晚只喺閒日星期三晚，都可以咁旺場啦。

個人評分
味道：9/10
環境：8/10
服務：9/10
抵食：9/10
平均每人消費：HK$380

餐廳資料：
ROJO
地址：天后炮台山木星街3號地下B舖
電話：2715 7777