賓墟餐廳 Bun Hui Restaurant：投「賓」湯粉麵

幾個老死晌長沙灣球場睇完波，原本打算行過去青山道嗰邊搵食，因為嗰邊選擇多，但喺大家都話好耐無踢，踢完成個人散散哋，故此就過咗對面「幸福商場」嘅「賓墟」食就算，好彩間餐廳收十點，我哋仲有大半個鐘頭嘅時間食飯吹水，又懷緬下昔日晌場上嘅風姿。

基本上呢啲餐廳都喺做街坊客，所以，過咗8:00pm已經唔多會有新客，何況，我哋成九點幾先嚟，變相包場，侍應阿姐一對一 貼身招呼。

環境都喺一般茶記格局，餐具、糖包、牙籤……等等都喺例牌擺喺枱側嘅抽櫃中，自己招呼自己。

嚟茶記多選擇，不過，小弟都一樣踢到榭晒，都無咁有心情慢慢影餐牌，只喺影咗自己所揀嘅泰式粉麵一版。溫馨提示，店家只收現金，呢樣就有啲唔方便。

魚蛋魚片湯河 $50

啱啱踢完波，唔算話好胃口，食啲湯粉麵就最好㗎喇。原本揀咗鮮味手撕雞湯河，可能真喺太夜，已經買晒，所以，求其揀魚蛋魚片湯河。當然，啲魚蛋魚片都喺嚟貨，不過，食落個質量都唔錯，有魚肉嘅鮮味，幾彈牙，河粉爽滑，份量十足，個湯底亦都唔太差，啱胃口。

熱奶茶

雖然踢完波，但我哋坐低涼咗好耐冷氣，個人都想飲番熱奶茶，最有風味。佢哋杯熱奶茶飲落算有水準，茶底幾幽香，茶奶比例都適中，只喺個人覺得唔算話好滑，但都收貨架喇。

魚片頭湯河 $50

另一個老友都同我一樣揀湯粉麵，不過，佢就鍾情於魚片頭，同樣都喺大大碗，魚片頭嘅份量都多，佢就話質素唔錯，又伴有少少蘿蔔、芽菜，算喺咁啦！

香煎美國西冷牛扒鐵板餐 $65

最估唔到嘅喺有位死佬原本都喺跟我哋食湯粉麵，不過，佢見到個鐵板餐只喺賣65蚊，覺得超好抵，就轉軚揀咗份西冷牛扒，當喺補充體力。唔喺講笑，唔知喺臨收工賣大包定喺點，塊牛扒 超大件之餘，唔單止鐵板有薯菜，另外老細再整多碟曲紋薯條，搞到我哋都要幫下手一齊食。至於件西冷扒喺點？老友話當然唔可以同啲扒房比，但咁嘅價錢絕對喺性價比高。

我哋幾個食完，當然繼續坐喺度打躉涼量冷氣，攤抖下，難得個老細都話唔介意，隨便坐，不過，都費事阻人收工啦，老闆無所謂啫，下面做細嘅啲阿姐阿叔梗喺想早啲收工啦。

個人評分
味道：8/10
環境：7/10
服務：7/10
抵食：8/10
平均每人消費：HK$50

餐廳資料：
賓墟餐廳 Bun Hui Restaurant
地址：長沙灣幸祥街8號幸福商場地下1號舖
電話：2204 1318