銘興山西刀削麵：輕「興」鬆鬆又一餐

同老婆晌紅磡啲殯儀館出席完安息禮拜，就專登落嚟紅磡搵食，因為晌德民街附近一帶有非常之多餐廳，選擇多又經濟實惠，加上近黃埔站，走又方便。行到近黃埔呢邊見到有間「銘興山西刀削麵」，有少少印象就喺幾年前晌大角咀食過一次，都成九點幾，望入去裡面坐滿人，證明餐廳有料到啦！

餐廳呈長型，一內進就一眼睇晒成間餐廳，裝修簡約，燈火通明，一邊牆身掛上玻璃，增加空間感，小掛燈令環境變得雅致好多。對比起大角咀店，呢度就睇唔到師傅整刀削麵喇。

出面仲有個自助區，自己斟熱水洗吓餐具，又或者攞啲酸蘿蔔食吓，啲酸蘿蔔仲喺任添，店家夠晒慷慨，絕對無斤斤計較，而且，啲店員服務幾好，又有禮貌，仲無服務費添。

餐具、牙簽、糖包晌枱側櫃桶，自由取用，如果有放啲紙巾就仲好。

大大本餐牌睇落選擇非常之多，不過，初頭睇嘅時候你可能會覺得有啲亂，但細心研究不外乎喺上湯、冷拌或熱拌刀削麵，以及多種小食、特色推介……等等，所有主食都包熱飲，但可以加錢轉配。

荔枝蝦球 $45
打開餐牌第一版有啲新品推介，見呢個荔枝蝦球得意喎，試試無妨。賣相真喺幾特別，幾似荔枝，雖然唔知外層嗰啲喺乜，類似旺旺仙貝咁，一口咬落去外殼好脆口；裡面嘅蝦膠就打得好彈牙，又有蝦鮮味，唔錯！唔錯！

牛筋腩冷刀削麵 $62

諗住天氣都仲喺好熱，所以，揀咗個冷刀削麵，由於冷麵關係，就加咗好多青瓜絲、花生、蔥花，再淋上胡麻醬嚟拌麵食，入口麵條好有韌勁，拌勻所有佐料，令到食味豐富；而啲牛筋、牛腩更喺入晒味，牛筋軟腍有彈性，而牛腩十分鬆化富肉香。

花雕醉雞米線 $65

老婆就揀咗花雕醉雞，估唔到喺成兜花雕醉雞咁送上嚟，份量十足，但最緊要喺啲雞好食，一來雞肉好嫩滑，二來皮下脂肪少，雞皮食起嚟好爽口，其次喺有酒香得嚟卻唔會好嗆喉，好有份醇厚感，雖然隻蛋未喺好溏心，但浸得入咗少少酒味，又幾過癮喎，加埋滑溜嘅米線，不愧招牌菜式。

阿華田脆脆 +$8、熱檸水

可惜豆漿只有凍，所以，老婆就照舊要杯熱檸水，而小弟見到杯阿華田脆脆幾特別，就試一試。阿華田沖得比較濃郁，面頭加咗好多朱古力脆粒，添加一份脆口感，都幾得意。

由於主食嘅份量都好足秤，所以，雖然睇見仲有好多幾吸引嘅小食都想試，不過實在擔心食唔晒，依家兩個主食加個蝦球都好飽喇，有機會下次先再嚟試試！

個人評分
味道：9/10
環境：7/10
服務：8/10
抵食：9/10
平均每人消費：HK$90

餐廳資料：
銘興山西刀削麵
地址：紅磡民泰街2-32號地舖
電話：23001189 / 23818891