Plato Cafe & Bistro：美食「柏」住上

自從開咗Airside之後，同老婆都多咗嚟新蒲崗呢邊，因為一出地鐵站天橋駁天橋就過到嚟呢頭，加上我哋住喺屯馬線之上，一程車就過到嚟，非常簡單方便。今晚就過到嚟Mikiki搵食，又可以逛吓「一田」 。見到新開咗一家「Plato Cafe & Bistro」， 大約喺年初到訪過其佐敦店，試過佢啲嘢有質素，所以，就同老婆試呢間，有保證嘛！

呢間由門面到內籠，比起佐敦店感覺截然不同，呢間嘅裝修明顯比較高雅，但不俗氣，而且樓底高，近門口一排排嘅卡位超級闊落，女生嘅話坐6個都無問題。

而餐廳呈L型，再入啲嘅用餐區亦非常之大，做上拱門框顯得非常優雅，而且，對住一排偌大嘅玻璃窗，就算喺夜晚無乜景，感覺都會喺開揚啲。

摺頁式嘅主餐牌，打開一睇就有齊所有菜式，包括湯品、沙律、薄餅、前菜、主菜、全日早餐 、意大利麵、意大利飯、甜品……等等，選擇非常之多。

如果想食抵啲，就梗喺揀晚市套餐啦，包是日餐湯、主食及基本飲品，而主食都有成14款選擇供應，應該都唔難揀。

再想食得好啲、又抵啲，就不妨晌兩款二人套餐 中落手，一款賣$458，另一款賣$546，同樣包前菜、餐湯、主食、甜品及飲品，計落確喺幾划算。

以二維碼落單，除咗個介面清晰易用之外，最欣賞就喺有好多額外選項，就好似咖啡、甜品都可以揀後上 ，牛奶又可以揀熱嘅。

餐具、糖包、牙簽就放晌枱上一旁，擺放整齊，份量充足，其實，亦反映到服務一環，晌預備上交足功課。此外，店員嘅服務都好細心，主動添水收拾，服務頗為熨貼，而且，都好有禮貌。

蘑菇忌廉湯
個湯睇表面已見有好多細微嘅蘑菌粒，未飲都聞到陣陣菌香，飲落菌味果然濃郁，質感柔滑，細微嘅菌粒 增添咗口感。

西班牙海鮮飯 $148

雖然唔喺傳統嘅西班牙飯有個小鑊盛載登，不過單睇賣相都非常有有料到，話晒呢個都喺廚師推介嘅菜式，海鮮料有大蝦、青口同魷魚，非常鮮甜，而啲飯粒夠濕潤，仲滲出濃濃鮮味，事後先知加咗唔龍蝦油去煮，真喺好有畫龍點睛之效。

露絲瑪莉香草羊架 $218
3大支羊架燒得外觀焦香，配以烤西蘭花同巨型焗薯，賣相已經夠搶眼。選上5乘熟，果然，煎到啱啱好，色澤粉嫩而唔會有血水滲出，小試一口，肉質柔嫩富羊肉嘅羶香，並滲出陣陣露絲瑪莉香草香。西蘭花烤過固然好食啲，而焗薯都好正，因為加咗酸忌廉同啲煙肉碎，又有薯味喎。

蜂蜜柚子茶

老婆就梗喺揀杯熱飲啦，呢杯喺佢最啱心水嘅，有蜂蜜又有柚子，嚟到嘅仲加咗片檸檬，飲落更加清新滋潤。

意大利即磨咖啡
小弟就留到食甜品時先上杯咖啡，感覺更加嘆，而咖啡唔單止喺即磨貨式，仲飲得出啲豆都喺靚貨，飲落醇厚芳香而細膩。

麻薯千層酥盒子配雪糕 $58

我哋所揀嘅一人餐就唔包甜品，所以，額外嗌咗呢款甜品共享。講賣相，真喺搶晒分，做得非常精緻。而麻薯千層酥盒子口感幾特別，幾酥脆，麻薯煙煙靭靭，仲搭咗塊拖肥餅乾配咖啡，真喺一流。

跟佐敦店一樣，綜合而言，無論環境、招呼，抑或食物，都好滿意，喺值得再光顧嘅餐廳。

個人評分
味道：9/10
環境：9/10
服務：9/10
抵食：9/10
平均每人消費：HK$233

餐廳資料：
Plato Cafe & Bistro
地址：新蒲崗太子道東638號Mikiki1樓116號舖
電話：3491 9739