三點三冰室 3.3 Cafe：「脷」字當頭

一講到「三點三」，普遍香港人都會想起下午茶，不過，今次唔喺講下午茶，而喺講晌青衣城嘅一間茶記「三點三冰室」。因為老友最近由葵芳搬咗去青衣，約佢聚一聚食餐飯，茶記就最啱我哋呢啲麻甩佬，所以，是夜就到訪咗呢度。

餐廳緊接商場通道，所以，設計比較開放型，晌鋪外已經可以一眼睇晒成間餐廳環境。裝修簡約，一室淺木系，加上柔和燈光，感覺蠻舒服。話時話，雖然只喺閒日一個晚上，但都幾旺場，坐滿之餘仲不斷一枱走就一枱入。

咁茶記嘅設定間間都差唔多，餐牌、餐具、調味料就放晒喺枱邊之下嘅櫃桶。

講返啲食物，茶記正就正在多元化，選擇方面分左多款系列，包括有點都要食系列、秘方咖哩系列、時時但但系列、焗一焗系列、炒粉飯麵系列、少吃多滋味系列及飲品。

另外仲有一個底面兩頁嘅今晚食乜餸系列，但睇落全部都喺啲扒餐，定價唔貴，都只喺百零蚊鬆啲。

同時下點餐模式一樣，搵侍應落單又得，自行掃二維碼慢慢搞亦得，介面清楚顯示各個系列，都好易睇。

妙齢乳鴿 $62

賀一賀老友搬新屋，食番隻乳鴿先。果然喺妙齡喎，因為咬落啲肉質非常之嫩滑細緻，而且，炸得外皮甘香脆口唔油膩，就算唔點淮鹽都醃得夠晒入味，當然點少少就更加鹹香啲。二維碼落單時可以揀免斬或者一開二，加埋一開四就仲好。

哈哈哈炒飯 $82
見個名咁搞嘢就試試佢，其實，餐牌都有寫喺加入蝦羔、蝦米同蝦球，但查實喺以蝦膏炒飯，再加咗櫻花蝦、蝦乾同蝦球，所以，應該喺「哈哈哈哈」4個哈先啱。個飯炒得幾夠乾身，飯粒分明，又有蝦膏嘅鹹香，加埋啲櫻花蝦，非常具口感，蝦乾同蝦球亦都好食。

焗牛舌芝士意粉 $78

老友原來都鍾意食牛脷，所以，大家都好心水呢一款焗牛脷意粉（可以轉飯）。揭起啲牛脷，有4大件之外，仲喺非常厚身，咬落去軟腍得嚟又有份爽口感，並有牛脷獨特嗰陣羶味；而啲意粉煮得啱啱好，唔會焗完之後會過腍。另外出面仲有啲卡夫嘅巴馬臣芝士可以拎嚟添加落去，咁就更加具芝士香氣。

狂牛 +$19

我點個炒飯時有得半價加配飲品，但唔知點解點個意粉嘅時候就無咗呢個優惠選項，都唔理，總之落到單就算，再者，餐牌又真喺無印住有加配優惠。老友膽粗粗試咗杯「狂牛」，喺七喜溝利賓納，再加入雜果同士多啤梨雪糕，賣相非常之夢幻，佢話飲落味道幾唔錯喎，甜甜哋好清爽。

紅豆奶茶 $38

小弟就份外喜歡奶茶，揀呢杯奶茶紅豆冰，呢個就最啱我喇，可以飲到奶茶，又可以食到紅豆冰。雖然紅豆嘅份量有少少偏少，但口感又綿又清甜，奶茶嘅茶底幾芳香醇厚，入口蠻順滑，唔錯唔錯。

原本諗住叫個黑白多士或者紅豆西多作為甜品試試，不過，食完隻乳鴿同埋兩個主食，老友話好飽吓，就只好留返下次有機會再試。

個人評分
味道：9/10
環境：7/10
服務：8/10
抵食：8/10
平均每人消費：HK$140

餐廳資料：
三點三冰室 3.3 Cafe
地址：青衣青敬路31-33號青衣城1地下G24-G25號舖
電話：2762 9818