羊滋味：悠「羊」滋味

喜歡食羊嘅朋友唔太多，不過有啲老死就確係幾鍾意食羊，記得好似上年冬天就一齊晌大角咀嘆羊腩煲。今次嚟到太子所試嘅「羊滋味」，一睇就知主打喺羊啦，又一齊擦番餐先。

走進鋪內環境好街坊，無話太花巧裝修，頂多喺牆上掛上唔少跟蒙古嘅裝飾，最街坊就喺餐廳尾有部大電視，正正播緊奧運直播，啱晒我哋，而幫襯嘅亦好街坊，聽落有唔少都喺熟客，同啲店員打成一片。

枱上放咗餐具、餐紙、調味料，自由取用。落單方面用二維碼，或向店員下單都可以。

雖然話主打喺羊嘅菜式，不過，呢度都有好多其他選擇，唔食羊嘅都唔使擔心，而且，有辣有唔辣， 涼拌小食、砂鍋米線、超多款碟頭飯餐，一系列內蒙古草原原始風味、特色煲類、串燒、麻辣燙，選擇多元化，最緊要喺定價實惠嘛！

涼拌羊蹄筋 $68

牛孖筋食得多，羊蹄筋幾敢肯定喺第一次食，佢哋啲涼拌小食可以揀辣或唔辣，我哋就要咗微辣，所以食落去有少少辣勁，但已經有點刺激感，而調味方面除醬油就仲有好多芫茜、蔥蒜，味道豐富，而啲羊蹄筋非常之咬口，有韌勁，食落真喺幾過癮！

羊肉煎餃 $48
牛肉、羊肉餃可以揀蒸、煮或煎，分兩個份量：7隻賣$48，10隻賣$68，咁嚟得梗嗻揀羊肉餃啦，要煎嘅香口好多，咬開嗰層皮薄到好似紙咁薄，而餃底就好脆口，咬落裡面羊肉味好突出，而且，肉汁勁豐富，非常好食。

砂鍋羊肉米線 $58

老友就想濕濕地揀過砂鍋米線，因為，仲可以飲啖羊肉湯，唔喺講笑，嚟到個砂鍋真喺超級熱焫焫，啲湯仲喺噗吓噗吓滾起嚟，而啲羊肉好鬆化，好有羊味卻唔會好羶，裡面仲有好多清甜嘅白蘿蔔、爽脆嘅木耳同埋豆卜，而米線份量十足兼且滑溜非常。

爆炒羊雜飯 $68

另外仲叫咗一個飯餐，有幾款飯餐都好想試，結果就揀咗呢個爆炒羊雜，同樣因為豬雜牛雜就食得多，羊雜真喺好少有，不過，其實都喺大同小異，都喺啲腸臟、肝臟之類，食落去好有鑊氣，醬汁香濃，撈飯一流。

燒原條茄子 $30

最後再追加多一份燒茄子，補充下啲纖維質，條茄子夾起啲茄肉已感受到燒得好透，非常之軟滑，並滿滿蒜香，正呀喂。

汽水$5、康師傅酸梅湯$10
飲品有跟餐優惠，晌門口棟出嚟個飯餐更喺包飲品。小弟就要咗支酸梅湯，解吓啲濃味嘢，飲落又寧舍清爽。

食到啱心水，合口味嘅嘢就會覺得自然好食，今晚全羊宴，試咗好款以羊入饌嘅菜式，又有不同部份，非常之唔錯，值得翻兜。

個人評分
味道：9/10
環境：7/10
服務：8/10
抵食：9/10
平均每人消費：HK$95

餐廳資料：
羊滋味
地址：太子界限街20號地舖
電話：3102 1989