入素 Green Entrance：心裏有「素」

因為老婆嘅回鄉卡就快過期，所以，襯得閒就過嚟葵興呢邊搞換證，人流唔多，流程簡單，好快就搞掂啲手續，搞完之後正正喺放飯時間，就過對面嘅KCC睇下有咩啱食，發現8樓有間食素嘅「入素」 ，啱晒老婆，二話不說就揀呢間！

鋪內地方唔大，不過裝修得幾雅致，一室淺木色系，幾有小清新嘅感覺。不過，啲櫈就唔算太好坐，因為佢個椅背比較後傾，如果有個咕臣墊一墊就會好好多。

入到餐廳尾尾仲有一排高腳枱櫈，偌大的玻璃窗外雖然喺工廠景，但點都喺感覺開揚，尤其是日陽光普照，感覺就更加舒服。

翻開餐牌頭一頁都有特別有介紹餐廳嘅背景，之後所列出嘅菜式都非常多元化，主食、漢堡、意粉、飯類、串燒、炸物、小食、沙律、素湯、飲品、甜品……等等，都一應俱全。

咁食晏時間簡單午市套餐就應該喺最划算，選擇同樣非常之多，包一客素湯及指定飲品，並可以加錢追加小食同升級飲品。餐廳採用二維碼落單，當然，搵侍應幫手落單亦無問題。

素湯

是日素湯喺清清地嘅香菇素湯，雖然話素湯咋喎，但唔會好淡茂茂，飲落味道都幾清甜，仲滲出微微菇菌香。

葡式乳豬飯 $82

個乳豬飯賣相真喺幾得，如果唔講話呢個喺素食，真喺以為喺真乳豬，夾你睇睇橫切面就知佢喺腐皮、豆製品造成，不過最驚喜喺層「外皮」，個樣好似乳豬層脆皮，咬落堅脆口；老婆仲讚佢啲飯好食，尤其加咗啲脆口嘅腰果同少少肉鬆，令食未更豐富。

桂花叉燒煎蛋飯 $82
呢碟叉燒煎蛋飯絕對唔喺頹飯，個樣做得幾精緻架，啲叉燒做到幾似模似樣呀，不過，切得有啲 碎濕濕嘅感覺，同埋比較薄身，如果能夠做番厚身啲就更神似。然而，入口嘅質感幾唔錯，同埋有陣陣桂花香味，篤穿個蛋黃撈飯食就更喺滋味。

熱檸檬綠茶、西柚菠蘿汁 +$8

入得嚟食素嘅都喺想健康啲，所以，我哋就揀咗檸檬綠茶，另外一杯就升級為低糖果汁，揀咗西柚菠蘿口味。前者當然跟同茶記嘅檸茶唔同啦，用咗綠茶味道無咁濃，但感覺清爽少少，而後者飲落確喺少甜，西柚菠蘿兩隻味道都平衡，不過個人覺得份量偏細杯，依家大熱天時飲兩啖就無晒。

成幢KCC仲有好多餐廳供選擇，「入素」嘅價位對比嚟講屬於中上，不過佢個環境喺幾舒服。如果你喺食素人士，當然值得嚟試下，否則，個人覺得仲有其他平靚正嘅選擇。

個人評分
味道：9/10
環境：8/10
服務：7/10
抵食：8/10
平均每人消費：HK$86

餐廳資料：
入素 Green Entrance
地址：葵涌葵昌路72-76號Life@KCC 8樓804號舖
電話：3160 8396