井茶 HASH：井「抵」之蛙

平時星期六都會喺番美孚食早餐，不過，今日就跳出美孚，嚟到長沙灣，因為陪老婆拎啲電器去深水埗嘅「綠在區區」收集站，所以，就喺富昌邨街坊商場「南昌薈」搵食，十幾年無落到咁深嘅位置，已經又唔同晒。晌個商場上下兩層兜咗一個圈之後，原來呢度都有幾多食肆，不過，都喺茶記「井茶」最啱我哋心水。

餐廳採用開放式鋪面，所以，喺外面都睇到晒裡面喺點，地方都幾大，裝修光猛，樓底有夠高，仲有揀呢間嘅原因喺因為見到比較人氣啲，同埋最鍾意喺二人枱相對多，可以減少搭枱嘅風險。

早餐有4大版，選擇非常之多，平貴都有，豐儉遊人，而呢度落單比較傳統啲，就喺搵侍應手寫落單。

餐紙、簡單調味包已放咗喺枱面，餐具就喺旁邊嘅拉櫃中，都喺茶記嘅慣常設定。

香煎豬扒米餐 $39

雖然老婆喺偏素者，不過，偶爾都食吓肉，頂多喺一星期食一次，佢近期就比較想食炸豬扒，所以揀咗呢個大碗香煎豬扒米粉。雖然佢個餐只得一碗米粉 ，但份量幾足，有兩大件炸豬扒，而且，醃得夠入味，炸得夠香口，咬落又鬆化，而米粉亦都無過硬或過腍嘅問題。

皇牌沙嗲牛肉麵餐 $42
小弟就繼續試唔同茶記嘅沙嗲牛麵，而呢個餐都幾抵，除咗一大碗沙嗲牛肉麵之外，仲有火腿、牛乳炒滑蛋配牛油厚多士。啲滑蛋炒得幾滑，但片多士就烘得唔夠脆，至於個沙嗲牛麵叫得皇牌 ，質素確喺唔失禮，牛肉大片又軟腍，麵條夠爽，作為靈魂嘅沙嗲汁校得香濃惹味。

熱檸水、熱奶茶

餐飲都喺例牌嘢，老婆要檸水，小弟就慣性飲。熱奶茶。單睇茶色都幾對辦，飲落茶味幾芳香，茶底亦幾醇厚，跟奶嘅比例都幾唔錯，口感都算 順滑，嚟到茶記揀奶茶真喺唔衰得去邊。

兩公婆嘆完個早餐，順道行吓呢個商場、對面V Walk，以及過少少嘅長沙灣海濱公園，吹吹風，感覺幾唔錯。

個人評分
味道：9/10
環境：8/10
服務：8/10
抵食：9/10
平均每人消費：HK$40

餐廳資料：
井茶 HASH
地址：深水埗西邨路19號南昌薈地下G24號舖
電話：2318 1611