龜記茗茶 GuiJi：「龜」根究底用料好

過到嚟「新都會廣場」攞嘢，偶然經過呢一間「龜記茗茶」，印象中好似舊年年尾晌台灣踩單車時見過，因為個名比較特別，見唔少人幫襯，就試番兩杯。晌等待期間，上網睇睇，原來佢晌台灣有超過百幾間分店，主打健康天然古早味嘅茶飲，唔會太多花巧嘢，並以較高級嘅茶葉做茶底，務求以質取勝。

一般台式茶飲店嘅裝修都比較簡約，呢度都唔例外，不過，晌一側墨綠色瓦仔牆身上，寫住「#小人物大生活」，喺幾搶鏡，見唔少人企埋去打打卡。

餐牌嘅分類都幾文青：醇萃、鮮調、鄉韻、奶茶、鮮乳、蜜蜂工房，仲兩款配料可加，如大多數台式茶飲店，糖度及冰度都可以自選，少量款式除外，如蜜蜂工房系列就有糖度固定。

如果心大心細唔知揀咩好，就不妨晌「熱銷排行榜」中睇吓有無心水！小弟一向喜歡珍珠奶茶或鮮乳飲品，而蜜蜂嘢就啱晒我老婆。

佢哋都沖咗啲奶茶俾大家試飲，不妨飲杯試試再決定揀咩飲。環保少少用上紙杯，不過，就可惜啲睇唔到裡面個樣，但都麻煩咗店員未封蓋前俾小弟影張相，難得佢哋又無所謂！

雷夢蘆薈蜜 $42
老婆問我咩叫做「雷蒙」，哈哈！如果去得台灣多你就知佢哋好多音譯嘅名詞改得特別有詩意，「雷夢」咪即喺檸檬囉，但呢杯所用嘅喺青檸，加上用咗「蜜蜂工房」嘅天然蜂蜜，飲落味道清新滋潤，加埋杯內有唔少蘆薈粒粒，添加多一份口感，清爽解渴。

碎銀普洱鮮乳+珍珠 $43

雖然久唔久都去飲茶，唔喺香片就普洱，不過，好老實再細分嘅，就真喺唔講究喇。而眼前呢一杯碎銀普洱鮮乳當然喺以鮮牛奶為主打啦，飲落香滑，奶味濃郁，細味之下滲出茶香，同飲奶茶又有啲分別，而珍珠口感比較軟糯多啲，但落得非常之多。

一杯台式茶飲好唔好，歸根究底都喺講用料，用料好就已經成功一半啦，加上好嘅配搭，製作認真，都差唔得去邊。

個人評分
味道：9/10
環境：7/10
服務：9/10
抵食：8/10
平均每人消費：HK$42

餐廳資料：
龜記茗茶 GuiJi
地址：新界葵芳新都會廣場266號
電話：4642 6282