一心打算試燒鵝，加上我哋有成9人，所以，都費事諗，就揀個6-8人餐（ $788），再加多半隻燒鵝湊夠成隻，加個炒飯，應該有收茶芥、加一，雖然唔喺小弟負責俾錢，但計番人頭，埋單應該大概$1,200左右，此外，仲有其他人數嘅套餐。
小食有啲酸蕎頭，食落酸爽香脆，卻唔會太嗆喉，正好為一陣間食燒鵝有個準備。
深井燒鵝（半隻）其實我自己本身都食過佢哋附屬茶餐廳嘅燒鵝瀨 （下午茶餐） ，知道都有一定嘅質素，個套餐本身包半隻，我哋額外加多半隻，好似要俾多$200。今次成隻燒鵝登場，當然賣相更有睇頭，而且，燒得確喺好靚仔，外皮睇落好亮麗，咬落非常甘香焦脆，鵝肉嫩滑細緻，更喺充滿油香，正呀喂！
粟米魚肚羹一大鍋粟米魚肚羹，睇相都見滿滿嘅魚肚，真喺好似食極都有，而且，魚肚羹個稀杰度推得啱啱好，味道亦都唔錯，不過始終我哋坐咗出面，感覺有啲悶熱，再食過熱焫焫嘅魚肚羹，喺會有少少打折扣。
翡翠龍躉球龍躉球切得比較大件，所以，計落喺唔夠我哋一人一件，咁當然我哋自行幫佢一開二啦。啲魚肉喺幾高質素，既嫩滑，又鮮甜，又有魚味。
豉油皇鵝腸一眾男士當然有唔喺三高之士啦，不過，面對咁好食嘅鵝，健康一於放喺第二位。鵝腸食落好爽脆，亦唔會有陣陣臊味，加上個豉油皇醬汁做得香濃惹味，配鵝腸真喺一流，連帶底下沾滿醬汁嘅芽菜亦都變得零舍好食。
菠蘿生炒骨小炒中生炒骨就最受人歡迎，一來好難自己屋企整，二來酸香醒胃確喺好送飯，而呢度嘅生炒骨同樣做得唔錯，外層仲有份脆口感，啲肉好鬆化 ，醬汁調教得酸香細緻，仲有喺啲菠蘿用新鮮貨色，唔係罐頭嘢。
腐竹浸時蔬時蔬用咗白菜仔再加啲草菇片，而腐竹就好嫩滑，又有豆香，個上湯都好清甜，時蔬索晒湯，食落味道都變得比較清甜。
清埋碟福建炒飯（影漏咗）大家都話嗌飽，份量算喺啱啱好，無嘥嘢。嚟呢啲地方食嘢服務就無乜㗎喇，相對喺經濟實惠啲，若非要坐晌出面，其實感覺會幾好。
個人評分
味道：8/10
環境：6/10
服務：7/10
抵食：8/10
平均每人消費：HK$135
味道：8/10
環境：6/10
服務：7/10
抵食：8/10
平均每人消費：HK$135
餐廳資料：
傅記燒鵝飯店 Fu Kee Chinese Restaurant
地址：深井青山公路-深井段41-63號深井村58-60號地舖
電話：2491 9832
傅記燒鵝飯店 Fu Kee Chinese Restaurant
地址：深井青山公路-深井段41-63號深井村58-60號地舖
電話：2491 9832
沒有留言:
發佈留言