椰仔冰室 Yeh Jai Cafe：亂撞搵「椰」

約咗啲朋友行山，但之前一日都出少少紋狀況，最後得另一個老死，大家都喺行得之人，所以，當日轉路線，入屯門行「花香爐頂」，尋屬猿頭石、麵包石、肥豬石同十字星石，呢條線真喺唔易行，因好多段都喺沙石路、上落斜，極具挑戰。完成之後，返出屯門搵食，就晌港鐵站附近嘅「椰仔冰室」補補體力，本身無諗住食邊間，佢位處大街一眼望到，又見門口咁多人，就中咗入去。

聽個名，你都會覺得喺啲新派少少嘅茶記，入到去，雖然主調都喺白色、米黃色，但加咗少少搶眼嘅螢光橙、螢光綠，感覺會神、醒目啲。格局都喺一般嘅4人枱、卡位之類，整體唔算話好逼。

打開餐牌，下午茶餐都好多選擇，不過一打開餐牌竟然喺扒類，仲有咖喱、焗類、西多磚、湯粉麵、包類、粉麵飯、炸嘢，全日早餐都有，真喺茶記先咁犀利。雖然行山途中我哋有帶到乾糧但只喺食少少墊吓肚，所以今次嘅下午茶真喺要食返個碟頭先補得番數。

簡單調味料就放咗晌枱上面，而餐具、紙巾就例牌喺側邊嘅抽櫃，排列得幾整齊。

咖喱豬扒意粉 $43

同老友今餐都鍾情咖喱，仲要大家都揀咗豬扒，不過，佢就要煎豬扒，小弟就要吉列豬，雖然豬扒得一塊，但睇相都見非常之大件，佢就話煎得甘香，肉質都幾鬆化，啲意粉烚得啱啱好，唔會過腍。

咖喱吉列豬扒飯 $44
小弟嘅吉列豬同樣好有睇頭，大過我嘅手掌有多呀，而且，又唔會話好薄身有將貨就價之感，一身金黃，最緊要就喺無將啲咖喱汁淋喺個豬扒面，否則整淋晒外層。先講件豬扒，真喺有水準，入口熱焫焫，咬落咔咔聲，脆到不得了，亦唔會話好油膩，而個咖喱汁推得幾香，撈飯食真喺一流。

熱奶茶、熱咖啡
小弟慣性嘅就選熱奶茶，老友要咗杯齋啡，兩者味道都有番咁上下，奶茶茶底芳香，茶奶比例啱啱好，入口順滑；老友就話佢杯咖啡好醇香，襯咖喱好唔錯。

茶記嘅食評一向都比較易寫，因為好多設定都差唔多，再者，晌茶記食嘢都唔喺要求啲咩特別嘢，都喺簡簡單單，只不過一份下午茶、一客碟頭飯。

個人評分
味道：8/10
環境：7/10
服務：7/10
抵食：9/10
平均每人消費：HK$44

餐廳資料：
椰仔冰室 Yeh Jai Cafe
地址：屯門屯門鄉事會路88號天生樓地下5號舖
電話：9518 8564