KIN 麵：過年後見個「麵」

有啲舊同學都晌中環區返工，不過，平時就唔太多約出嚟食飯，因為小弟公司有包伙食，佢哋又喜歡自家帶飯，話健康啲，又可以慳番啲，不過，一年總有三幾次見吓面。趁過年無耐，就約出嚟見見面，提議嚟到已被活化「中環街市」內嘅「中環食坊」，貪佢地方大，環境好，又多餐廳選擇。

當中「KIN 麵」嘅麵食甚有特色，「KIN 麵」攞個諧音就喺「見面」，啱晒我哋幾個舊同學見個面。店家主打亞洲各國風味麵食，以中環而言，定價算親民，大致上都喺$68-$88，所以，正值飯市，見到大排長龍，不過，點菜流程都快，唔需要等好耐。

而落好單，就轉過去隔離等嗌號碼，等候期間，就見到一邊師傅不停淥麵，入面嘅師傅就不停咁炒粉麵，樣樣都即叫即做，但發覺以湯粉麵上得較快，因為製作簡單少少，而炒粉麵會等得耐啲。

講講有咩選擇先，一共9款麵食，以地區而言，有本地、台灣、韓國、星馬、泰國……等等，貴精不貴多，每款麵食均附送茗茶一杯。而事後先知，餐牌每一款麵食右下角嘅標誌，原來代表緊同行裡一啲精英餐廳或品牌嘅出品，真喺集各家之大成。

順帶一提，取食物區一旁，有少少額外醬料可以自行添加。

仲有就喺，如果外賣嘅，歸還KIN有機食品容器，將獲得Loopy Loyalty電子印花一個，八掛登入去望一望，原來儲夠12個印花可以免費換一碗麵食，既可以支持吓環保，又可免費食一餐，無理由唔撐架。其實，睇見佢啲餐碗同餐盒都好特別，事後上網睇睇，先知喺100%可生物降解嘅產品，喺農業嘅副產品嚟，採用APM製法，用小麥加工而成，呢啲咁科技嘢小弟就唔多識，總之可為環保作貢獻啦。

整個美食廣場有很多位，室內、室外均有，室內位感覺比較逼，依家天氣咁清涼，撞啱今日又咁好陽光，無理由唔揀出面架。剛啱中座仲整咗座大花牌，非常有本土味，晌度食餐晏，比起晌快餐店、茶記，感覺都唔同啲。

韓式人參走地雞湯叉燒麵 $88

比起一般見慣見熟嘅日式燒麵，呢碗自然感覺清新啲，佢喺「Dam:a Noodle Bar新派麵館」嘅出品，湯底喺傳統韓式人參雞湯，但為免太霸道，明顯參味減低啲，又不失雞湯嘅溫醇，同學話飲落好暖身，誇張少少講，好似血氣運行都快咗；而叉燒非豚肉所做，襯番個湯，做成雞叉燒，故口感非常嫩滑；麵條喺傳統嘅日式拉麵，煙韌耐浸，再配上木耳絲、大蔥碎、少少韓式泡菜，加埋隻有水準嘅溏心蛋，確喺一道別有風味嘅拉麵！

泰式辣有機牛炒河 $88
呢一道炒牛河喺出自淺水灣嘅「Sip Song」泰國菜館，因為喺即叫即炒，一出嚟，捧上手感覺份外香，喺嗰種「鑊氣」感，而且，色澤均勻，炒得每炷河粉也好上色。話喺有機牛肉，雖然唔知產地、部位，但都試咗一小嚿，非常軟腍，又富肉香，唧埋啲青檸汁，更有東南亞風味，河粉好特別，粗幼不一，有啲喺大大片，但好滑身，炒得香口，粉內仲有啲芥蘭、草菇，味道好唔錯。

檳城潮州炒粿條 $78
小弟本身都幾喜歡星馬菜，所以，揀咗炒粿條，其實有啲似炒河粉。上網睇過，佢應該喺嚟自馬拉嘅一個食物品牌「Axian's Selection 」。講真，雖然鍾意食，但就唔太識分正唔正宗，但最緊要喺好食，啲炒粿條炒的好香口，混合咗啲魚露同醬油，好惹味，加埋鮮爽嘅大蝦、甜甜哋嘅臘腸，整道菜就更加美味。所附送嘅熱茶好似喺蜂蜜茉莉花茶，幾清香，襯番啲濃味嘅炒粿條。

本地蜂蜜和走地雞蛋撻 $9
見佢支持本地食材，又即管試一試，由於用上蜂蜜，蛋撻嘅色澤比較深，小弟所食到嘅唔似喺新鮮出爐，口感方面會有少少打折扣，但論到味道，算喺唔錯，蛋香味十足，仲有微微嘅蜜香。

就算一碗麵，做得有誠意，食客都喺會食得出，如果多心嘅客人，嚟到「KIN麵」，更喺可以一次過品嚐到亞洲唔同地方嘅特色麵食。

個人評分
味道：9/10
環境：7/10
服務：8/10
抵食：9/10
平均每人消費：HK$78

KIN 麵
地址：中環皇后大道中93號中環街市地下G11號舖
電話：Nil