盈滿冰室：補足「盈」養

又喺同班老死踩單車嘅日子，今次嘅人腳可謂人強馬壯，所以，可以踩得盡慶少少，一於由大埔起步，經粉嶺、上水去到元朗，再原路返轉頭去返大埔。10:00am起步，踩到去元朗剛1:00pm，放飯時間，以前會去「南山軒」，因為而家佢哋唔做午市，改為去「盈滿冰室」。

其實我哋幾個食乜都無所謂，但求搵個地方歇歇休息吓、填吓肚，所以，由朋友帶路嚟「盈滿」，茶記一間，當然無問題。裡面嘅格局同大部份茶記差唔多，一眼望上去，幫襯嘅大部份都喺街坊。

茶記嘅菜式一向都喺包羅萬有，但我哋都費事諗，晌午餐度着手，有中有西一個12款，定價$48-$55，既送例湯，又包餐飲，抵食呀。

枱面玻璃之下，仲攝有一張基本餐牌，都影埋出嚟俾大家參考吓。

例湯

喺極「例湯」嘅例湯「青紅蘿蔔煲豬骨」，店家都好慷慨，大大碗奉上，夠老火，撈到唔少料，喺幾好飲。

咖喱牛肉飯 $50
呢度啲醬汁絕對喺大放送，好似呢個咖哩飯嘅咖哩汁超多，另外佢地鍾意飯餸喺分開上，所以，餸量多，飯量又多。而老友話佢啲咖喱幾唔錯，雖然屬於港式，無印度式咁多香料味，但都幾香；牛肉好腍滑，配料更喺特別多。

豉椒炒雞球飯 $48

都話啦，呢度茨汁勁多，大老友講笑咁講，茨流成河呀，真喺好在喺飯餸分開上咋。雖然個茨有啲「杰」身，但喺幾惹味嘅，撈飯都好好食；雞肉份量都OK，口感都嫩滑。

梅菜蒸扣肉飯 $48
小弟就放肆少少，揀咗唔多健康嘅梅花菜扣肉飯，原來喺「限量發行」，我呢碟已喺最後一碟喇。成大大碟梅菜蒸扣肉，多到好似一道小菜咁，撥開啲梅菜，睇到扣肉非常多，而啲扣肉唔算肥，比起上次晌古洞嘅「錦益茶樓」，呢次啲算瘦好多，肉質還算鬆化，但整體感覺無「錦益」咁好食，主因喺啲梅菜無咁香。

茶記餐飲就梗喺奶茶啦，寧舍香滑，不過，今次就影漏咗。因為仲有回程車要踩，所以，碟白飯只食一半都好夠，其實有啲嘥，知道咁大兜飯，就叫佢半飯都夠晒。

個人評分
味道：7/10
環境：6/10
服務：8/10
抵食：9/10
平均每人消費：HK$48

餐廳資料：
盈滿冰室
地址：元朗水車館里11號地舖
電話：2881 0862