山區裡的走走趯趯: 自．然烘焙 Natural Bakery：妙不可「然」

2023年2月24日星期五

自．然烘焙 Natural Bakery：妙不可「然」

早前睇啲雜誌已見介紹過呢一間有誠意嘅麵包蛋糕小店，強調食得健康，用上靚料，無添加任何化學嘢、防腐劑之類。今晚收工後就趁過到嚟鴨寮街買電話卡，就順道一訪，睇睇有無咩心水選擇。

小店賣嘅就喺真材實料嘅蛋糕，所以，睇落裝修方面比較簡約，成間鋪嘅空間好大，唔會搞到逼逼狹狹。

對住櫥窗喺擺放蛋糕嘅凍櫃，蛋糕款式非常多，而且，又頗為別出心裁；裡面角落位就喺一組L形麵包櫃，個個都獨立包裝，夠晒衛生；另外就有小小區域擺吓其他烘焙產品，以及凍飲。

近收銀側旁，原來仲有啲掛耳咖啡包賣，啱啲人買個包之餘，再買個掛耳咖啡包返公司，嘆杯靚咖啡。

其實，樣樣嘢都好吸引，最後揀咗啲甜品作為飯後甜點，而另外選多一份牛奶方包，作為聽朝早餐。

椰汁荷包蛋 $20
除咗蛋糕，店家都做咗啲布甸，是晚就見到有兩款味道：呂宋芒布甸、椰汁荷包蛋。咁咩叫荷包蛋呢？其實喺椰汁布甸，裡面再加粒呂宋芒嘅果肉，布甸入口質感比較似意式奶凍，超滑身，如果喺布甸口感會較為挺身啲，嗰份椰汁味非常突出，雖然只得一粒芒果肉，但甜度十分高，芒果味清甜。

小籠包 $38
呢一款法式蛋糕喺店家招牌，之前睇雜誌都喺重點介紹佢，當晚晌櫥窗所見，除咗個「小籠包」，仲有一款「小壽桃」添，非常別緻。講番個「小籠包」，粉色嘅外觀加上紐紋狀，感覺很少女風，加上一片雪花形白朱古力片，賣相漂亮。名牌就寫住喺黑加侖子芝士，食落芝士味就唔喺好覺，但黑加侖子味就好突出，酸香細緻，慕絲嘅質感好綿滑；中間就喺檸檬吉士及朱古力海綿蛋糕，底下仲墊咗片脆餅，令到整體味道更豐富、更具層次，真喺內外兼備。