山區裡的走走趯趯: 漁初·魚丼 Isarihatsu Sakanadon：活在「丼」下

2023年2月7日星期二

漁初·魚丼 Isarihatsu Sakanadon：活在「丼」下

由於小弟有唔少親戚朋友都住問深水埗、長沙灣一帶，所以，間唔中都會嚟到呢一頭，都睇到呢頭嘅變遷，亦見證唔少食肆嘅起起跌跌。好似今晚到訪嘅「漁初•魚丼」，記得年幾前嚟嘅時候仲喺做緊鐵板燒，如今就變為以海鮮丼為主嘅和食店。

唔喺講笑，才7:00pm，差唔多全院滿座，非常熱鬧。門面嘅裝修就極具和風，走進店內，佈置就間約啲，但天花有唔少別緻嘅和風掛飾，如雞泡魚燈籠、藤織魚形燈罩，都非常有趣，而兩邊牆身就貼滿唔少精美嘅食物照，務求吸引大家嘅食慾。

整體地方唔算大，近門口喺二人、四人枱，而再入啲，就喺吧枱位，可以睇到師傅切魚生、製作壽司，我哋剛好被安排坐晌吧位。

晌「枱頭」，除咗擺咗唔少清酒出嚟，最特別應該喺自家浸嘅梅酒，不過，小弟本身唔好酒，否則都想試試，有興趣嘅客人就不妨小酌一杯。

我同老友都喺算健康之人，飲杯熱茶仲啱我哋，而熱茶就無咩特別，但啲日式茶杯就好靚仔。啲公仔唔喺就咁印落去，摸上手有凹凸坑紋，色彩艷麗。

翻一翻餐牌，海鮮丼飯就見到有好多款式，預設嘅就已經分咗好多款系列，喜歡自已揀心水配搭嘅，又有自選魚生飯，此外，仲有佐酒小食、刺身、卷物、壽司、手卷、串燒及特色燒物，選擇非常之多。

最特別喺凡叫海鮮丼（一人一丼之下），醋飯喺可無限添加，但好老實，咪睇啲丼飯好似細細碗，查實飯量不少，除非喺「飯桶」，好大食，否則相信大部份人都唔需要添飯。

此外，更提供新鮮日本生蠔，不過，由於我哋無打算食，所以，亦無刻意問價，只知晌燒物中有一道蒜香燒生蠔而已。

豚肉露筍卷 $28

先嚟一客串燒熱吓身，豚肉切得薄薄一片，包住啲露筍嚟燒，出嚟嘅效果好正，外層嘅豚肉充滿油香，有少少食煙肉嘅感覺，而露筍本身爽嫩脆口，食落無渣，嚟咗啲油香，更豐腴甘香。

鰻魚豆腐天婦羅 $78
再試一道小食，見唔少食評都讚呢個小食，的確，咁嘅配搭已好少見，仲要做成天婦羅，非常有意思。咬落外層脆卜卜，唔油膩，裡面嘅豆腐就好嫩滑，滲入微微鰻魚嘅油香，再加埋鰻魚嘅柔嫩口感，口感極富層次。

E3 海鮮丼飯 $88
我哋不約而同都喺揀火炙鰈魚邊系列嘅丼飯，老友呢一款包括火炙鰈魚邊、油甘魚、三文魚、玉子燒，賣相做得精緻，詳情就唔講喇，總之老友一路食，就一路讚，主要都喺覺得啲食材夠新鮮，無論油甘、抑或三文，油潤肥美，加上件件厚切，食落大滿足，而火炙鰈魚邊更喺有驚喜。

E2 海鮮丼飯 $98
我揀呢一款海鮮丼，同樣食材多元，包括有火炙鰈魚邊、帶子、北寄貝、蟹籽、玉子燒，賣相同樣吸睛，色彩繽紛好靚仔，又夠立體喎，真喺可以講話未食就先興奮，認真期待。而魚紋嘅木匙羹都好得意。

順帶一提，每個丼飯都可以加$15就配有沙律、湯及前菜，咁划算，目測所見都無乜人唔加配。簡單嘅田園沙律淋上柚子醋，已喺好清新醒胃，而前菜喺爽口嘅中華沙律，稍嫌無乜特色，又跟啲沙律有相類似，反而俾啲漬物個人感覺仲討好；至於個味噌湯真喺正喎，麵豉味極為香濃，又「暖笠笠」。

輪講分享個飯，啲醋飯果然唔錯，店家講明喺用上日本米，飯粒黏糯，混上少少蟹籽一齊食，口感唔同晒；日本芥末同啲生薑片已放咗晌片紫蘇葉後面，一口魚生，一片生薑，再一啖飯，鰈魚邊本身已油份足，燒一燒更能逼出油香，有種入口即化嘅感覺；帶子及北寄貝都好鮮甜，前者口感柔嫩，後者就帶點韌勁，同樣好食，就連玉子燒都無欺場，蛋香味十分濃郁。