Alvy's：「酒」出另一人生

港島西延線開通之後，西環一帶社區起咗好大變化，食肆更加多咗好多，不過我自己就少過嚟呢邊。最近有老死轉咗工，入咗數碼港度做嘢，但無理由小弟山長水遠入數碼港食飯架，所以攞個中間點，就過嚟西環呢邊聚一聚食番餐，而今晚嚟到呢一間酒吧餐廳「Alvy's」，就喺因為睇過啲介紹，講到佢哋嘅菜式好搞嘢，中西融和，應該叫港西融和，頗有賣點。

門面採用磚紅色，好易認，入到裏面，先喺吧位，唔食嘢，嚟飲吓酒都好寫意。望入去，其實個鋪位都幾深。

而右邊喺第一個用餐區，一室仿磚牆，裝修得好有外國農村餐廳嘅感覺，氣氛相當唔錯。 加上呢度有唔少外國人幫襯，所以唔講嘅話都可以呃到人去咗外國。

再入啲，有另一片用餐區，以梳化卡位為主，牆上仲掛咗好多大大細細嘅相片，大多數都跟美國相關，如美棒、紐約地圖……等等，好典型嘅懷舊美國風。

行到最入，仲睇見佢哋嘅開放式廚房，最搶眼嘅 莫過於嗰座好專業嘅高溫嘅薄餅烤爐，所以嚟到呢度，點可以唔嗌薄餅食吖！

呢度另一嘅賣點就喺睇到有好多特色手工啤酒，睇見酒保後一排排嘅「水龍頭」，再加上頭頂上面鏡面板所顯示嘅啤酒名，就知佢哋提供好多Tap Beer，有本地品牌嘅，亦有外國進口嘅，單睇名你未必好清楚喺乜，可以向侍應問問味道喺點，佢哋話包有好多驚喜。

此外，食物方面，除薄餅，咁當然仲有其美食，如小食、沙律、意粉及甜點，最緊要喺嘢食夠高質，定價亦唔算貴。

另外，既為酒吧餐廳，賣酒永遠喺重點，亦喺好賺錢嘅渠道。雞尾酒、紅白餐酒、烈酒……等等，一應俱全，唔飲得酒嘅一樣照顧到，可以揀非酒精雞尾酒、汽水、果汁、茶品。

而打算坐好耐又好飲得嘅朋友，就不妨考慮店家嘅2小時任飲優惠，$300位就可以任飲指定酒類、檸檬水、梳打、果汁，此外都要溫馨提示一吓，呢個優惠每日都有指定供應時間，星期一至五就4:00pm-9:30pm，星期六、日就12:00pm-9:30pm。

睇完一輪餐牌，最划算都似乎喺二人餐，包一客小食、一客前菜、一款指定沙律，然後揀一款薄餅或意粉，再加兩杯啤酒，以每人收費$238都算抵食。

Just Peachy Cider (Neonotic)
飲酒嚟講，小弟就唔喺太在行，好偶爾先會小酌一杯半杯，揀本地蘋果酒製造商Neonotic嘅Cider，貪其酒精度應該無咁高，加上桃味又好啱我。的確呢一杯啤酒真喺好對我口味，非常之易入口，桃味亦甚為突出，但不失飲啤酒嘅感覺，果然有驚喜。

Hangry Dount Hopiscus Wheat (Heroes)
老死同樣揀咗隻本地酒廠Heroes所出嘅啤酒，酒精度唔高，5%左右，所以，都易入口，佢就話口感好清爽，嗒吓嗒吓，有陣陣花香味，喺幾有趣嘅感覺。兩個老死碰碰杯，無咩望，但願生活愉快，身體時刻保持健康。

招牌肉丸
雖然餐廳賣嘅喺多國菜，但似乎都喺主打意大利食物多，意大利菜就有一道肉丸，呢度嘅招牌肉丸散點要百幾蚊，但唔知有幾多粒，套餐嘅就有兩大球，大到成個上海菜嘅獅子頭咁，賣相幾唔錯。講到粒肉丸，真喺超鬆化，好有肉香，非常好食，味道豐富。再睇返餐牌，原來肉丸裡頭有豬肉、牛仔肉，仲配上茄蓉，又灑上大利羊奶芝士、檸檬青、添點紫蘇葉，唔怪之得咁正。

威士忌燒烤雞翼
作為香港人，雞翼當然食唔少啦，不過呢個加咗威士忌嘅唔知效果會喺點。查實食落又唔喺好覺有咩酒味，有都揮發咗，之但喺搽喺雞翼上面嘅燒烤醬超惹味，又燒得香脆，真正皮脆肉嫩 ；至於伴碟嘅薑蓉酸忌廉醬，真喺好使好用，一來可以搵西芹條沾嚟食，又可以加落啲雞翼度食，剩返嗰啲 ，之後撻落去啲薄餅度食，一樣咁鬼正，有種神來之筆嘅感覺。

腐乳汁凱撒沙律
經典嘅凱撒沙律加上腐乳汁底之後，真喺好有噱頭，而平時凱撒沙律上面嘅煙肉碎，就換咗叉燒去代替，中西融和，幾有心思。食落感覺都唔錯 ，有種鹹鹹香香嘅味道，而沙律菜本身都好新鮮爽脆，加埋啲麵包粒、巴馬臣芝士碎，好食得嚟有本土特色。

煙肉芝士漢堡薄餅
有幾款薄餅都喺心水想試，但點解會揀呢款薄餅，都因都喺貪心，睇勻餐牌所有薄餅款式，呢一款包嘅食材喺最多，簡單嚟講就喺將平時食到嘅芝士漢堡會有嘅材料擺晌薄餅度，包括蕃茄醬、漢堡肉粒、車打芝士、莫沙里拉芝士、煙肉、醃青瓜、紅蔥頭，好多料，味道勁豐富；而批底用上酸種去做，做成薄批，但多份柔韌感，又有唔少燶邊位，正呀喂！

個薄餅大大個，所以，我哋兩個死佬都食到好飽，環境唔錯，招呼到位，我哋一邊食，一邊講東講西，當然，老死轉咗新工，自然有好多新工嘅體驗分享，但願老死工作順利，搵到份好啱做嘅工。

個人評分
味道：9/10
環境：8/10
服務：8/10
抵食：8/10
平均每人消費：HK$263

餐廳資料：
Alvy's
地址：西環堅尼地城荷蘭街8號地舖
電話：2312 2996