三岔路口 Samgeoli：亳無落「岔」

人生總有好多決擇，嚟到岔路口，有時左右都難選，何況喺三岔路口！不過，今晚同朋友嚟到尖沙咀嘅「三岔路口」，只管食，唔使諗咁多。呢度喺家韓燒店，但唔食韓燒，其海鮮湯鍋一樣好有睇頭。

走進餐廳，地方幾大，就喺見慣見熟嘅一貫韓燒店格局，圓形不銹鋼枱，上抽式抽風，電油桶櫈；此外，仲有幾列卡位，感覺闊落。再者，講到服務，幾位侍應有禮之外，更不時主動收拾碗碟，而侍應多為韓國人，亦有香港人，唔怕溝通唔到。

枱上已放好餐具、燒烤工具、紙巾，而點餐就用枱旁嘅電子屏幕，所以，今次就影唔到餐牌俾大家參考喇。

韓式泡菜、大豆芽、醃蘿蔔

食韓國菜其中一大特色，就喺餐前必奉送韓式前菜，今回有傳統嘅韓式泡菜、大豆芽同醃蘿蔔，泡菜微辣啱晒我嘅辣度，大豆芽清爽，蘿蔔就爽脆酸香，正所謂各有特色。最正嘅喺，所有前菜都歡迎無限添加，夠大方。

乳酸汽水 $10、葡萄汁 $15、梨汁 $15

飲品無特別心水，小弟就隨心揀咗罐梨汁，以前去食放題都飲過，覺得都唔錯，味道喺幾清甜，又唔太甜，裡面仲有少少梨肉纖維。

辣醬醃蟹 $248
老友未食過醬油蟹，所以，先嚟一道加辣版嘅辣醬醃蟹，唔好睇佢一片紅卜卜，其實韓式辣醬唔喺好辣，易入口，蟹肉新鮮軟滑，鹹鹹哋，辣辣哋，仲配上一大碗紫菜飯，配飯食效果特別。

海鮮韭菜煎餅 $98

煎餅晌韓國菜都好有特色，頭盤食完個醃蟹，就再嚟個煎餅先。一睇就知非常足料，每一口都食到海鮮同韭菜，而且，煎得香口，唔油膩，口感軟糯，沾少少醬油，更有提鮮之效。

炸醬拉麵配芝士煎蛋 $68
如果有睇開韓劇嘅朋友都知，韓國人好鍾意食公仔麵及炸醬麵，呢個炸醬拉麵唔知算唔算二合為一呢？隻蛋煎得好靚仔，將芝士撈入麵中溶透之後再拌勻，麵條入口有韌性，味道香濃，唔錯！唔錯。

螃蟹湯 $588

是晚嘅重點菜式卒之登場，全部新鮮材料共冶一鍋當你面即場煮，材料非常豐富，有鮑魚、大虎蝦、3大隻螃蟹，仲有啲似喺內臟之類，並配有大量大豆芽同蘿蔔，堆得滿滿一大鍋，侍應會全程幫你處理，大概10-15min就滾起有得食。

個湯有咁多海鮮一齊去煮，自然鮮味無限，飲落鮮甜帶點微辣，更喺好暖身。無論鮑魚，抑或虎蝦、螃蟹，都非常鮮味，啲蟹更可謂幾爆膏，絕對交足貨，實在過癮。

今晚唔算多人，所以，招呼亦好熨貼，侍應亦好細心，好似食醃蟹時又奉上膠手套，令整晚用餐體驗幾唔錯。此外，亦食得出用料有質素。

個人評分
味道：8/10
環境：8/10
服務：9/10
抵食：8/10
平均每人消費：HK$382

餐廳資料：
三岔路口 Samgeoli
地址：香港尖沙咀寶勒巷3-7號萬事昌廣場1樓101號舖
電話：9238 5375