BKK：午間「泰」閒情

晌中環食晏，喺呢區返工嘅人都知，好似打仗咁，一來放飯時間超多人，二來大家食飯都喺嗰一、兩個鐘。不過，今日唔同，趁老細出門，同老友上到嚟「元創坊」食晏，一來人流無咁多，二來有食友推介裡面有一家泰菜店「BKK」，食物做得好有水準。

單睇門面，已知餐廳幾大，走進去，無咗泰式啲神神佛佛，但裝卻花咗心思，對着正門嘅一座大古鐘，加上整體以木系為主，有份寧靜古雅感。

裡面分開幾個區域，其中中間一區以泰國獨有嘅「篤篤車」座位做成卡位，闊落寬敞，每枱擺放古典枱燈，氣氛滿滿。

泰國一向俾人感覺喺個好渡假嘅地方，行經水吧嘅時候，發現有條樓梯可以通去後面，原本別有洞天，喺個半開放嘅用餐區，藤椅、梳化櫈、木板地，加埋好多植物，寫意無限，極具泰國風情。

餐墊紙原來就喺餐牌，分為Soup, Salad & Small Bite、Mains & Wok、Desserts，而飲品方面亦有唔少選擇，酒類、非酒類都有。

炭燒封門柳沙律配米粉跟特色醬汁 $138

唔喺單單用牛肉，而喺封門柳，淨喺呢樣都已經加分啦，嚟到賣相亦好養眼，放滿芽菜、香葉、青瓜、醃菜、甘筍絲、花生碎、乾蔥，底下墊有大量米粉，淋上自家製蔥油魚露，撈勻即可。味道豐富紛陳，酸酸鹹鹹，口感多樣化，而封門柳軟腍富肉香，好食。

泰式海南雞飯 $108
主食類先嚟碟海南雞飯，外觀平穩紮實，最正喺伴有蔥油、泰式辣醬同另一款辣醬，更伴有一大碗油飯及清雞湯。先講啲雞，用上新鮮三黃雞，雞肉腍滑，外皮爽滑，但皮下脂肪卻甚少，沾上任何一款醬汁都好好食；油飯飯粒爽身，有雞油香，真不錯。

泰式和牛炒粿條 $128
麻甩佬都鍾意食乾牛河，加埋用上和牛，當然試吓呢道主食啦。粿條有啲似河粉，只喺形狀不一。果然，炒出嚟好有鑊氣，上枱時聞到陣陣香氣，又炒得均勻，每炷粉都上晒色，好惹味，和牛肉亦幾嫩滑，而且，份量不少，仲有好多配菜添。

Ice Thai Milk Tea $28

小弟向來都喜歡飲奶茶，所以，揀番杯泰式奶茶一試。估唔到又幾香滑，除咗茶味，多咗一陣陣嘅香料味，跟港式嘅截然不同嘅感覺。

Mango & Passionfruit Smoothie $78

老友揀嘅芒果熱情果沙冰，堅用上新鮮生果打，佢話非常好飲，濃郁鮮活，酸香清爽，口感綿密細緻，讚呀！

泰式椰汁糕 $78

最後，來點甜。泰式嘅甜品向來都頗有特色，經典自然喺芒果糯米飯，不過，因為太經典，成日食，今次不如改改試椰汁糕。賣相精緻，更喺糕面加上新鮮清甜嘅芒果蓉，當然要加佢分，而椰汁糕挺身爽口，椰汁味濃，裡面仲混有椰青肉，正呀喂。

少有晌中環食晏咁輕鬆，加上呢度環境唔錯，閒日午市客人又唔算太多，所以，感覺更加悠閒，再者，招呼熨貼細心，有好幾位侍應喺泰國人（因為佢哋之間用泰文溝通），但廣東話講得正過本地人呀，哈哈，溝通絕無問題。

個人評分
味道：9/10
環境：8/10
服務：9/10
抵食：8/10
平均每人消費：HK$307

餐廳資料：
BKK
地址：香港中環鴨巴甸街35號PMQ元創方A座Staunton地下SG09-SG14號舖
電話：2330 0306 / 6069 7477 (WhatsApp)