動茶 Auto-Tea：動口不動手

無人駕駛、無人機、無人商店……依家好興無人乜乜乜,，早前經過「麗新商業中心」偶然見到呢一部無人台式飲品機，唔喺賣罐裝汽水嗰啲，而真喺落單後，即點即製，由機械代勞，做出台式手搖飲品，見幾過癮，又唔喺貴，買兩杯試試。

相信都喺初階段，所以，見其產品都唔算多，主要分為4類：奶茶系列、茉香奶綠系列、芋泥系列、果茶系列，定價$24-$32，而每杯份量都設定為500cc容量。標明茶底及材料每日新鮮煮製，全自動化製作，無口味偏差又衛生。

晌螢幕中全自助咁落單，相信去得多快餐店嘅人都熟悉點搞，甜度、冰量都有得按自己喜好選擇。落單後，睇住機內嘅電子手臂郁嚟郁去，加入奶茶、糖漿、配料、冰粒……等等，再封口，真喺幾得意，成個過程都全自動化，感覺真喺幾夠衛生。

百香椰果綠茶 $26

老婆最好就喺百香果，所以，晌果茶系列中一眼就相中呢一款配椰果嘅綠茶。色澤鮮明，入口感覺好清爽，綠茶茶底唔錯，亦滲出陣陣百香果嘅酸香，甜度亦啱啱好，底下仲有唔少椰果粒，飲吓又咬吓，幾過癮。

茉香珍珠奶綠 $26

小弟就揀咗茉香奶綠系列中嘅珍珠奶茶，佢哋嘅珍珠奶茶所用嘅珍珠有別往常嘅黑色珍珠，而喺用咗金黃色嘅琥珀珍珠，但口感一般，未喺好夠咬口，而且，珍珠嘅份量都有啲偏少；茶底方面，亦失色少少，茉莉茶所做嘅茶底未夠芳香，而且，感覺奶嘅比例佔得多咗。

整體嚟講，不過不失咁啦，都喺純粹試吓，所以，本身又無話抱咩期望嘅。

個人評分

味道：6 /10
環境：- /10
服務：- /10
抵食：7 /10
平均每人消費：HK$26

餐廳資料：

動茶 Auto-Tea
長沙灣長沙灣道680號麗新商業中心地下G39號舖
2633 3030