OK便利店：OK = OK

有次同老婆晌屋企附近行完轉短山上石梨貝水塘，之後入咗Circle K打個轉，初頭諗住買啲嘢飲吓就算，再返屋企煮嘢食，但發現有啲即買即食嘅薄餅，咁就改改策略速食薄餅。

呢間Circle K有少少特別，就喺裡面有個烘焙廚房，不時都有新鮮出爐麵包賣。而上述嘅薄餅，都喺晌店內焗製，可謂新鮮出爐。

啲薄餅睇落唔錯，又唔貴，故決定買個返去試吓。口味仲有好幾款選擇，如辣肉腸、夏威夷、煙肉蘑菇……店員話不時轉款。此外，仲提供一啲雞翼、雞鎚小食，亦都唔貴啊！

最後，買咗一款薄餅，再加蛋撻，啲蛋撻一買就要4個，即喺兩盒（每盒兩個），既然喺兩個裝嘅包裝，點解無兩個兩個咁買，試過之後明白點解。

燒汁海鮮雜燴薄餅 $22

拎到返屋企當然唔會熱焫焫，所以，我哋都稍微放入焗爐烘番熱少少。你見都算叫幾多料，又加咗唔少芝士，唔會太hea，而厚身嘅批底咬落軟熟，廿蚊貨仔，真喺算唔錯架，比起啲急凍就肯定好食好多，最緊要都方便嘛。

蛋撻 $14 / 4個

單賣一個標$5，比起周邊嘅麵包鋪，唔喺平，佢哋喺包裝好，每盒喺兩個，所以，基本上無一個個咁賣，而買兩個又好唔抵喎，故此，大多數嘅人都被綑綁一買就4個。啲蛋撻望落真喺幾靚仔，但味道真喺麻麻哋，唔喺難食，但無乜蛋香，反而有陣陣好重嘅奶粉味，總之，感覺有少少怪怪哋，幸而撻殼都脆，叫做還可以。

之前都有試過佢哋啲麵包，其實都幾OK架，不過，今次嘅蛋撻真喺麻麻。

個人評分
味道：6/10
環境：-/10
服務：-/10
抵食：7/10
平均每人消費：HK$15

餐廳資料：
OK便利店 Hot & In 美食吧
葵涌景荔徑8號盈暉薈地下G-04號舖
電話欠奉