山區裡的走走趯趯: The Bottle & Chicken：「雞」不可失

2022年4月26日星期二

The Bottle & Chicken：「雞」不可失

疫情總算緩和多咗，所以，都放心出嚟人多車多嘅旺角，打算利用啲消費券買番對「免費」波鞋，當然先行一行「波鞋街」睇睇款先啦。咁耐無出嚟，受疫情影響，真哋見到好多吉鋪，就晌洗衣街一段，見到吉鋪堆中有呢一家小店「The Bottle and Chicken」，所以，就支持吓小店撐吓場。

鋪位窄窄，一睇就知喺只做外賣，亦明顯針對旺角一帶後生仔多，喜歡掃街食街邊小食。其實，探頭望一望，個鋪都幾深長，而且，望落都幾乾淨企理。

顧名思意，就知主打喺乜，啤酒配炸雞，後生仔鍾意，老外亦鍾意。原來，又唔單止淨賣炸雞，仲有好多炸嘢賣，睇睇牆邊嘅彩印相片及鋪前嘅暖櫃，選擇都幾多，如香草雞中翼、黃金雞鎚、吉列海老、吉列廣島蠔、椒鹽魚蛋燒賣、芝士魚棒飯糰、吉列墨魚餅……等等。

此外，鋪上方有顯示屏幕，清楚列出正式有咩主打選項，包括世一脆脆炸雞（可配珍珠米或撈烏冬）、王牌香草雞胸飯、吉列脆皮壽司卷、墨西哥街頭粟米餅……等等，定價亦算相宜。最搞嘢仲提供埋西班牙肉桂油條（Churros），更可自選配搭雪糕球同配料，而且，雪糕球同配料嘅選擇非常之多。

飲品方面，就晌鋪前嘅凍櫃，先取就得喇，有樽裝果汁、自家製冷泡茶及手工啤酒，落單後先知飲品有加配優惠，好似小弟揀咗支果汁，就有單點價$12變成加配價$8。

晌暖櫃旁，仲有幾款額外調味料任加，如蕃茄醬、沙律醬、芝士粉同辣椒粉，小弟就最好芝士粉，樣樣食物都加咗唔少。

最後，要咗一份大嘅炸雞配珍珠米，再加兩款小食，加配一支果汁，夾埋都喺$88，始終油炸嘢喺會滯肚少少嘅，所以，食落都夠兩個人食。紙盒盒身除印咗店家嘅標誌，仲有佢哋各社交平台嘅二維碼，想了解佢哋最新資訊，就可以自行走上去睇睇。

世一脆脆炸雞配珍珠米（大） $35

炸雞飯有細、大、加大，原以為大嘅唔會好大，叫正正常常咁啦，原來，份量真不少，一個男生絕對好夠食，而且，炸雞亦唔會得三幾件，完全鋪滿晒晌飯面，連埋啲飯，近乎放密晒成個紙盒，拎上手已覺得好墜手。啲炸雞真喺幾唔錯，拎到返屋企仲熱焫焫，外層好脆口，入口又唔算好油膩，再者，小弟糝咗唔少芝士粉，就更添香濃芝士味；飯底都好軟綿，而我就揀咗邪惡芝士奶油忌廉汁，撈飯一流，不過，只恨忌廉汁有少少偏少，俾多啲就更好。