Baker Talent 新加坡麵包達人：有緣再見「麵」

講開「麗閣商場」，以屋邨商場嚟講，佢真喺幾幾有型，以組裝貨櫃嘅概念打做，為「麗閣」呢個老屋邨添咗唔少活力。事緣到長沙灣政府合署搞完文件，揀咗過嚟長沙灣站搭地鐵，見到呢個商場就打打卡。

咁啱晌地下鋪見到過江龍「新加坡麵包達人」（Baker Talent）有鋪，索性買啲麵包當下午茶同聽日早餐。

其實唔睇名，格局都喺同啲港式麵包鋪差唔多，四周麵包櫃放滿個裝麵包，不過，重點喺啲麵包都已獨立包裝好，比較衞生，而且，擺放得好整齊，短短逗留一陣，已見店員不時整理麵包啲擺位。

不得不提，就喺店家嘅招牌作「D24 榴槤菠蘿包」，亦喺吸引小弟專登行埋嚟嘅原因，只可惜，賣晒，緣慳一面。不過，其他麵包嘅款式亦好特別，唔喺港式麵包鋪見慣見熟嗰啲，否則，都唔會試咁多個啦。

此外，佢哋另一名物，就是葡撻同芝士撻，不時出爐，亦非常搶手，而且，定價非常親民。其實，其他啲麵包都同樣定價好相宜。

除咗麵包，仲有蛋糕、瑞士卷、冬甩、馬卡龍……等等特色產品供應。

而近收銀處旁，則有個大凍櫃，提供各式飲品，更有自家製嘅樽裝咖啡同奶茶，不過，今次我就無試。

蔓越莓乳酪包 $9.5

4款包中，呢一款屬於軟包，成個日式燒餅咁，包身真喺好軟熟，食落實在唔會一陣風咁。除咗混入蔓越莓乾之外，包心仲夾有一層忌廉芝士，因為我哋都用多士焗爐稍微翻熱，軟綿綿嘅芝士餡變得又香又滑。

咖椰班蘭菠蘿包 $8.5

試唔到個榴槤菠蘿包，退二求其次，試番個富星馬色彩嘅咖椰班蘭菠蘿包，估唔到第二朝以多士焗爐烘翻熱，個外皮一樣好似新鮮出爐咁脆。因為包身都加入班蘭去做，所以，一片青綠色，不過，由於中間夾有咖椰醬，所以，多多少少都冚咗啲班蘭香氣。食呢個包，立時令我想起石硤尾「占美」嘅名物之一「菠蘿占」，好耐未食過。

爆漿朱古力包 $9.5
老婆好鍾意朱古力，屋企都備有一大盒「唂咕粉」俾佢凍嚟飲，所以，特意揀咗呢一款「爆漿」嘅朱古力包俾佢。依個喺切開方便影相，之後先再微微翻熱食，啲朱古力溶得啱啱好，軟化得嚟唔會瀉到一手都喺，朱古力味勁濃郁，帶點甘苦味，唔太甜，合晒老婆心水，正呀喂。

蜂蜜韓國柚子包 $8.5

哈哈，呢個又喺揀俾老婆嘅，因為佢某程度都算喺柚子控。睇樣可以無咩特別，但打開包裝，陣柚子香氣好突出，因為包面放咗好多蜂蜜柚子皮，所以，食起嚟甚具柚子香，又有陣陣蜜糖清甜味；中間仲有少少忌廉吉士，包身同樣好軟熟，整體確喺有質素。

雖然試唔到榴槤菠蘿包，但其他幾款包都唔錯，最緊要喺啱食啫。

個人評分
味道：9/10
環境：7/10
服務：8/10
抵食：8/10
平均每人消費：HK$9

餐廳資料：
Baker Talent新加坡麵包達人
深水埗東京街12號麗閣商場地下3號舖
3743 0838