山區裡的走走趯趯: 果子 Life Cafe：不「膩」之材

2022年4月10日星期日

果子 Life Cafe：不「膩」之材

第五波前都有同大埔老友踩吓單車，之後，就當然要暫緩吓啦，直到最近，疫情落咗好多，單車就仲未踩住，不過，就行轉短山。既然就大埔老友，就行番嗰邊，並專登晏少少起步，行完食午餐都可以避咗個高峰時段。老友帶路，推介呢一家主打星馬菜小店「果子」，見人話風評不俗。

門面唔算好大，但原來踏入鋪中，就會見到個鋪位好深、好長，環境整體都闊落，一室木系裝修，設計比較簡約。絕大部份都喺4人座，加上依家仲喺2人限聚，又過咗放午飯嘅高峰時段，啲客又識各自走位，所以，倍感寬敞，坐得舒服。

雖然，餐廳主力喺賣星馬菜，不過，午市各類套餐亦增加咗多元化，定價亦親民。午餐基本上附送飲品，不過，既可以加配小飲，轉其他嘢飲，又有優惠，變得更具彈性。

飲品方面，除提供意式咖啡之外，最驚喜有唔少台式飲品，補番個價亦唔貴，所以，我哋都轉飲特飲。其實，佢哋加咗咁多台式飲品，就喺見佢哋拓展埋飲品外賣嘅生意。用餐期間，都見唔少年輕人嚟買凍飲。

惹味沙嗲牛肉串燒 $22

星馬菜嘅小食，第一時間就想起沙嗲，老友同我都鍾意食，所以，試上一客沙嗲牛肉串。牛肉面面淋咗好多沙嗲醬，香濃惹味，帶有花生微粒，貨真價實，而牛肉燒得有點焦香，又唔乾，記緊要趁熱食。

馬鈴薯炸蝦卷 $22

另一款小食就揀呢個炸蝦卷，因為覺得幾得意，賣相亦都幾靚仔，炸到金黃。外層嘅薯仔絲炸得香脆，最緊要喺唔油膩，而裡面嘅大蝦亦好鮮甜，口感爽彈，食得出唔喺雪藏貨，沾上類似泰式嘅甜酸醬，更具風味，並更減油膩度。

海鮮喇沙摻摻 $60

睇外觀就知份量好十足，大大碗，兼且個喇沙湯頭色澤金黃，面頭放滿海鮮，有鮮蝦、大蜆、魚片、豆卜及雞蛋，老友話實在吸引。先呷一口湯底，濃郁鮮香，椰香慢慢滲出，夾雜富層次嘅香料味，佢話個湯的確好得；啲餸料亦都好正，蝦同蜆都好鮮，魚片夠爽口，老友話第一次食「摻摻」，即油麵拼米粉，覺得好過癮，特別有口感，索晒啲湯入口，真喺無得彈。

無骨走地海南雞飯 $65

午餐中有款「無骨海南雞飯」，但我見餐牌面又有一款賣貴少少嘅「無骨走地海南雞飯」，問問店長，原來前者喺油脂多啲，肥啲，而後者就基本無乜肥膏，爽身啲，所以，揀後者嚟試試。走地即喺走地，皮下脂肪近乎無，而雞皮好爽，啲肉又好嫩滑，加上已去骨，啖啖肉；佐食嘅3款醬汁：薑蓉、秘製橙醬、黑醬油，夠晒傳統、地道，油飯亦出色，飯粒爽身，帶少少油香，卻唔膩，搵埋啲薑蓉同黑醬油撈飯食，更喺一流。