The Coffee Academics：包場早餐

曾經食過「The Coffee Academics」嘅蛋糕，覺得甚具質素，不過，佢哋嘅其他產品就未試過。由於早前做咗個網上問劵，獲贈一張$50現金券，是日早上就專誠嚟到試試咖啡，再加個鬆餅，作為一頓輕怡早餐。

晌門口望入去感覺會好細，其實餐廳佔地兩層，地下主要喺製作飲品、翻熱食物嘅地方，喺鋪尾入到篤有啲梳化椅。

但上到樓上，可謂別有洞天，裝修摩登型格，木地板，配以帶點原始嘅灰色水泥牆，而牆上嘅掛畫就增加咗啲藝術感。最估唔到，話晒都喺早餐時段，但竟然一個人都無。

推開落地玻璃門，出面仲有幾個露台位，雖然只喺普通街景，但感覺會開揚好多。

食物方面，呢一間分店就以輕食為主，但有啲分店鋪位較大，可提供唔同嘅熱食。食物嘅種類，基本上就晌收銀旁嘅凍櫃一眼睇晒，都喺啲包餅、沙律、蛋糕、三文治……之類。

飲品方面，頭上一個長方招牌就數得晒，款式唔算多，同大部分嘅連鎖咖啡店差唔多，但定價唔平，而且，亦無得揀唔同嘅份量，只喺分凍定熱而已。

雖然早餐、午餐、下午茶有啲組合配套，但都需要以正價買咖啡，再用優惠價配唔同嘅食品。因為飲品本身嘅定價都唔平，所以，就算有啲咁嘅優惠組合，個人覺得性價比都唔高。

鮮奶咖啡 $45

始終呢度都喺主打咖啡，所以，質素應該唔使太擔心。拉花無太大驚喜，只喺最基本嘅心形，而且，線紋可以講喺唔細緻，亦未完全對稱，所以，觀感上個拉花喺有啲hea，唔應該喺呢度出品嘅質素。幸而，沖泡出嚟嘅咖啡，質素算喺唔差，味道醇香、口感平均，完全唔使攪，飲落每一口都一樣。 

海鹽焦糖鬆餅 +$10

鬆餅見有4款供應，除海鹽焦糖，仲有榛子朱古力、藍莓及雜莓，並可要求翻熱，如果散買單價要$28，真喺比出面一般嘅定價高。咪睇佢外表平平無奇，面頭只得啲果仁碎碎，重點喺「內涵」，一咬入心，原來裡面有啲焦糖漿，好有「流心」效果；而鬆餅本身有點鹹味，質感又帶微微濕潤，整體感覺唔錯。

其實中環有唔少咖啡店，連鎖嘅或非連鎖嘅都多，而「The Coffee Academics」位處蘭桂芳上面，晌地理位置就蝕底啲，加上定價相對高，怪唔之得今早一個客都無。如果以同類型計，小弟會揀置地裡面嘅SimplyLife喇，因為又就腳，性價比又高。

個人評分
味道：8/10
環境：8/10
服務：8/10
抵食：7/10
平均每人消費：HK$55

餐廳資料：
The Coffee Academics
中環蘭桂坊1號LG及UG樓
2110 1728