百份百餐廳 Cafe 100%：綠州茶餐

晌美孚，有條山路可以一直行到上「華景山莊」，唔算難行，我同老婆都行過好幾次，次次上到「華景」呢個搵食沙漠，都話嚟呢間全個「華景」嘅唯一食店「百份百餐廳 」嘆個下午茶，有住晌「華景」嘅朋友就話感恩有「百份百餐廳」呢個綠州。卒之，朝早晌屋企專登整咗份頗豐富嘅全日早餐，晏晝就跳咗午餐，到2:30pm就行個短山上到嚟嘆下午茶。

無論晌門口，抑或入到裡面，都見餐廳晌防疫方面都做到好足，晌不同位置，都放有抗疫資訊牌，不斷提醒大家，以增加大家嘅防疫意識。 

踏入餐廳，昏暗嘅燈光，走少少工業風咁款，不過，如果你揀正右邊一排位，有偌大嘅落地玻璃窗，就會比較光猛，感覺更清爽。

下午茶時段為2:00pm-6:00pm，咁有啲咩選擇呢？因為佢哋有兼營麵包店，就晌近入門口處，所以，早市或茶市都提供一款「鮮製麵包套餐」，一款特色包加杯熱飲，賣$22-$24，喺比較經濟嘅選擇。

 另外，就喺晌茶記或快餐店見慣見熟嘅選擇，如炸雞脾呀、西多士呀、公司治呀、湯粉麵呀……等等，亦有飽肚啲嘅迷你炒粉飯麵。由於我哋都無食晏，呢餐話就話下午茶，但都當埋午餐，所以，兩個都揀咗炒粉麵。

滋味迷你焗鮮茄豬扒飯 $39

果然真喺有啲迷你，唔好睇相以為好大碟，其實隻碟好淺吓，不過，賣相有啲吸引，因為鋪滿鮮茄醬，又灑咗唔少芝士碎，上枱之時喺幾香噴噴吓。

飯底喺炒過嚟，而且，質感都頗為爽身，喺有誠意嘅表現，而鮮茄醬似喺落咗唔少茄膏去推，濃就濃喇，但有少少過火，比較酸；

豬扒就唔似「大家樂」嘅「一哥焗豬」咁，一大塊厚切，而喺有3小塊，厚薄就較家常嗰種，無咁有睇頭，但就方便啲食用。豬扒入口都算鬆化，亦醃得入味，整體嚟講都OK啦！

星洲炒貴刁 $41
諗住好似個焗飯咁，個貴刁都會「迷你」咗，事實又唔喺喎，個份量都幾十足，而且，算炒得唔錯，有鑊氣，色澤均勻，仲有好多餸料，叉燒、火腿、蛋絲、銀芽、蔥度……等等，帶微微咖喱香，最欣賞喺食完又唔會一碟底都喺油。 

熱奶茶、熱好立克

本來諗住嘆杯咖啡，但睇到佢枱邊對奶茶嘅介紹，就改變咗心意。

的確，杯奶茶嘅茶底喺幾幽香，入口濃郁醇厚，茶、奶比例恰好，然而，口感嘅滑度就無乜驚喜，但個人而言，都收貨架嘞！ 

上文都講過佢哋有麵包賣，最後，都買咗袋紅莓方包返去，當喺聽日早餐。輕鬆走山路落山，又完咗今日嘅短山之行。

個人評分

味道：7/10
環境：7/10
服務：8/10
抵食：7/10
平均每人消費：HK$40

餐廳資料：
百份百餐廳 Cafe 100%
葵涌華景山路9號華景山莊華景商場地下20號舖
2574 8100