上返官網睇睇，個「Vacation Box」嘅基本起錶價喺$298（原價要$420），包咗一客二人份嘅西班牙海鮮鍋飯、兩道冷盤（西班牙火腿及蜜糖茄子卷、薄切慢煮八爪魚）及兩客西班牙水果茶啫喱。此外，亦有6款招牌冷盤、西班牙果酒、非酒精特飲可以額外加配，每日下午3:00pm截單，當晚6:00-8:00pm送貨，真喺日頭即興想夜晚食餐西班牙菜都無問題。但溫提一下，滿$500就免費送貨，否則，就要收番$80作為運費，服務範圍亦只有九龍及香港島啫。
送貨前，送貨嗰邊都有whatsapp嚟做地址確認，而整個外送包裝，冷熱食物都會分開以保溫袋包裝好。打開保溫袋，估唔到再有個精美包裝硬盒裝起所有食物，絕對唔會嚟到時壓到啲食物變形或走樣，真喺連包裝都見到心思，好多細節位都做到一絲不苟。最驚喜喺個西班牙海鮮飯，直頭原鑊咁送嚟。
Red Sangria $48 / Grapefruit Sangria $48
講到西班牙菜，就一定會想起西班牙果酒（Sangria），唔飲得酒嘅都無問題，佢哋亦有啲非酒精特飲俾客人揀，每樽足500ml，只賣$48，非常抵飲，尤其西班牙果酒。事實上，一飲你就知無將貨就價，好足料，前者紅酒滲出陣陣果香，繼而散發出一股微微酒勁；後者嘅西柚特飲帶着自然嘅西柚清香，卻有添一份果香嘅層次感。
西班牙火腿及蜜糖茄子卷（套餐）
基本套餐包咗兩款西班牙冷盤，呢一款喺一道好有驚喜嘅菜式，以西班牙火腿加上薄片嘅茄子捲住啲沙律菜做成，佐以黑醋及蜜糖，就算乜都唔點，單喺件火腿茄子卷咬落已好有層次感，味道鹹香中誘發出清爽感，再試試沾上黑醋及蜜糖，味道更多變咗，是晚嘅推薦菜式之一。
薄切慢煮八爪魚（套餐）呢一款冷盤之前晌店鋪都食過，真喺店家嘅幾招牌，而套餐都包埋就真好。個八爪魚嘅最大賣點，就喺捕獲後由當地即時慢煮5個鐘，之後再空運過嚟，再嚟薄切後，塊塊都厚薄均一，伴以自家製嘅蕃茄蓉初榨欖油，令味道油潤清新，而八爪魚嘅質感柔韌帶咬口感，再細嚼八爪魚嘅鮮味更突出。
加泰隆尼亞式烤雜菜沙律 $48 記得店家有一道好好食嘅「蟹肉及辣忌廉芝士釀烤甜紅椒」，不過，散點項目就未有供應，不過，想試西班牙出名嘅甜椒，就可以考慮試吓呢道烤雜菜沙律，因為，主食材就喺用咗西班牙出名甜椒，烤焗好再伴以初榨欖油，灑點香草，甜椒烤到軟化晒，入口陣陣清甜味，簡單自然。如果家中有啲百吉包，不妨切成薄片，佐以甜椒同食，一樣好滋味。
棒棒鵝肝 $58
睇番啲食評記錄，堂食一客要$78，仲只喺有3支，但依家就$58 ，卻有4支，性價比已經高咗好多。基本上，跟堂食嘅一樣，都做得精緻，鵝肝搵白酒蒸煮過再搓成丸，入口口感綿密豐厚，鵝肝嘅香腴濃郁；同樣伴以開心果仁、喜瑪拉亞岩鹽及黑胡椒粒所做成嘅佐料，令整體味道變得更具層次。
西班牙黑毛豬火腿24個月 $68
講到西班牙小食，點少得經典嘅西班牙黑毛豬火腿吖，晌一啲西班牙餐廳，更備有24、36、48個月嘅種類，小弟甚至有見過去到60個月，當然風乾熟成嘅日子越長，定價又一定越貴，但我哋呢啲唔喺咩食家嘅大眾，24個月嘅貨色已經喺好夠皮。事實上，啲黑毛豬火腿油潤而富光澤，入口肉質細膩，味道鹹香，一片火腿，一啖西班牙果酒，喺極優雅嘅享受。
西班牙海鮮鍋飯（套餐）
上文都提及過，「西班牙海鮮鍋飯」喺原鑊咁送嚟，非常揼本，而個鑊咁靚仔，我哋就已經打算留起煮嘢用，絕對唔會嘥。專登對照番上次晌店內所試嘅西班牙海鮮飯，直情同晌店內食到嘅無分別，所以，感覺絕對唔似食緊外賣，飯面鋪滿海鮮，有大海蝦、青口、大蜆、魷魚，用料絕對不賴，每款海鮮都鮮甜好食；紅紅嘅飯底充滿海鮮香味，飯粒分明卻入口濕潤，唧埋少少檸汁，加埋啲藍芝士醬，撈勻嚟食就更好味。
西班牙水果茶啫喱（套餐）
套餐仲包有兩客甜品，雖然西班牙油條喺經典，但送到嚟都腍晒啦，而呢款水果茶啫喱亦喺佢哹招牌，因為用料十足，無欺場，以西班牙果酒為藍本所做，啫喱味道好清香，配以大量夏日雜莓，打側睇個杯身就見到有幾多雜莓晌杯內，所以，整體而言，入口清甜酸爽，味道感覺自然，驅走晒夏日悶氣，更平衡番之前食咗咁多道嘅濃味菜式。
除咗由保溫袋、包裝盒、個別食物格、冷熱分開……等等做到一絲不苟之外，食物嘅賣相、用料跟堂食無太大分別，難得啲食物都保持到水準，尤其一系列冷盤、凍飲、甜品，而個西班牙海鮮飯送到嚟都仲算暖暖哋，我哋就原鑊放入大焗爐烘番熱啲，故此，風味保持到。出國旅行唔知幾時先得，今次總算以美食嚟感受吓一股西班牙熱情。
個人評分
味道：9/10
環境：-/10
服務：8/10
抵食：8/10
平均每人消費：HK$190
味道：9/10
環境：-/10
服務：8/10
抵食：8/10
平均每人消費：HK$190
餐廳資料：
Tapa Room
牛頭角觀塘道348號國際貿易中心地下G02號舖
2866 7755
Tapa Room
牛頭角觀塘道348號國際貿易中心地下G02號舖
2866 7755
沒有留言:
發佈留言