天仁茗茶 TenRen's Tea：茶飲小確幸

本身都幾鍾意台式飲品，尤其啲花果茶、珍珠奶茶，不過，平常就唔會刻意買嚟飲，通常喺去開台式餐廳食嘢，或特別原因先會買。今次都有啲特別原因，就喺晌「中電」嘅會員活動中換咗杯珍珠奶茶，故此，趁食晏時間專登行過嚟換咗杯返公司飲，搭啲芝麻餅當下午茶，鬆一鬆。話時話，原本閣鱗街有間「天仁茗茶」，但近來無咗，搬咗去極隱蔽嘉咸街嘅「My Central」，好難搵吓，總之落去香港站分店啦。

茶飲有咩選擇，晌櫃枱前嘅價目表就一目了然，當然離不開原茶茶飲、新鮮果茶、鮮奶茶、沙冰……等等。

有買開台式茶飲嘅朋友都知，可以揀甜度，此外，亦可揀唔同嘅冷熱度。

913黑糖珍珠鮮奶茶 $30

正常甜度嘅台式茶飲我都覺得有啲偏甜，所以，要咗半糖，加上攞返公司喺等晏晝飲，所以，要咗少冰，其實，要去冰就啱，反正都喺返到去再雪。因為加入黑糖，原本杯奶茶嘅賣相會幾靚仔，不過，用咗紙杯，就乜都睇唔到，但棄膠杯都好嘅，感覺環保少少，罪惡感少啲。

小弟本身都幾鍾意珍珠奶茶，黑糖亦喺我幾喜歡嘅食材，而用上佢哋嘅招牌913茶王做茶底，預期應該唔錯。飲落，茶底確喺幾醇香，而且，又確喺滲出陣陣黑糖香，攪兩攪，底下都撈到幾多黑糖珍珠，咬落QQ，夠晒煙韌，又有清甜嘅黑糖味。

一啖奶茶、一口珍珠、再一片芝麻餅，就喺是日下午嘅小確幸。

個人評分
味道：8/10
環境：7/10
服務：8/10
抵食：7/10
平均每人消費：HK$30

餐廳資料：
天仁茗茶 TenRen's Tea
環嘉咸街23號My Central高層地下9號舖