紅茶冰室 Red Tea Cafe：大展「紅」圖

近排天氣好唔穩定，一時落大雨，轉頭又出晒太陽，好似馬來西亞、新加坡咁，今日，就趁難得天氣報告講到明，全日陽光普照，就同老婆食完早餐就行轉山，由美孚經幾段山路，行到入大圍，全程輕鬆行2.5小時左右，基本上喺零難度。而中午到達大圍，就晌火車站附近嘅「紅茶冰室」食個晏仔，貪其就腳，食完就可以過對面搭火車走。

由於仲有限聚令關係，每枱只准坐兩個人，所以，雖然餐廳地方都幾大，更有埋樓上，但好易「爆滿」，幸而茶記嘅客流量快，我哋都唔使等好耐。

餐具、調味料、紙巾，就拉開枱側下面嘅櫃桶就見，依家去好多茶記嘅「指定」設計，所以，唔好吓吓舉手嗌侍應，先摸摸枱邊有無「機關」。

基本餐牌就好似啲舊式茶記咁，攝晒入枱面玻璃下，影出嚟有啲反光，唔喺好清，幸好有啲外賣單張攞，索性掃描出嚟就更清楚。而選擇，同大部份茶記差唔好，唯一特別喺，佢哋兼營埋麵包鋪，鋪面另一邊就喺大賣港式麵包、蛋撻，所以，不時有新鮮出爐嘅麵包，仲要一有出爐，侍應就會滿場叫。

故此，我哋都特登點咗其鎮店之寶「招牌冰火菠蘿油配經典紅豆冰餐」（$26），睇睇會唔會拆招牌先！

經典紅豆冰 $26

咁嘅組合只賣$26，肯定喺抵食價嚟，先嚟杯紅豆冰，夠晒大杯呀，而且，勁多紅豆，絕無欺場，啲紅豆又腍又清甜，奶水唔會水汪汪無味，交足貨。

招牌冰火菠蘿油

菠蘿油又點呢？之前晌中環一家茶記都見過冰鎮牛油，所以，唔覺有咩驚喜，不過，咪睇片牛油好大片，卻喺好薄，少咗份一口咬落「牛油」嘅風味，而個菠蘿包亦無預期咁熱辣辣，但「菠蘿皮」就真喺勁脆。

另外，餐廳有供應午餐，共有4款選擇，包餐湯、餐飲，定價$57-$60，估唔到入到嚟大圍嘅茶記都唔平，可能近港鐵，淨喺食「鋪租」都佔一大截啦。

羅宋湯（餐湯）

餐湯如一般茶記，有紅湯（羅宋湯）或白湯（金必多忌廉湯），選前者因為啱老婆飲多啲，忌廉湯就比較肥。而碗羅宋湯睇落都好對辦，入口酸香而帶點辣，又有好多蔬菜，夠足料。

板燒豬脾肉配紅酒野菌汁飯 $57

賣相又幾靚仔喎，外貌其實有啲似豬扒飯配燒汁，但啲豬脾肉入口會比較有啲韌性，就正如好似食豬頸肉咁，唯挑剔位喺我哋兩個都覺得有少少過鹹，但仍可接受；而個紅酒野菌汁又幾唔錯，紅酒味就唔覺喇，有都揮發晒啦，但汁底濃郁，撈飯一流，啱我。

熱奶茶（餐飲）

熱奶茶用番全統茶記厚身茶杯，保溫力強，而杯奶茶嘅茶底甚香，茶奶比例好，雖然未至於超順滑，但芳香馥郁，算喺有水準嘅港式奶茶。

同朋友whatsapp被問開，由美孚行到大圍喺咪好辛苦，梗唔算啦，我老婆都行到，當日天氣好好，就擺一、兩張相分享吓。依家波就無得踢喇，周末行吓山喺唯一比較大運動量嘅活動嚟，疫情喺點都好，生活都要稍稍平衡吓，最緊要做足防疫，保持社交距離，三十度之下，戴住口罩行山，其實都OK架！

整體而言，「紅茶冰室」嘅出品都有一定質素，不過，服務就普普通通，雖然無開聲催你走，但收晒啲杯碟兼晌對講機話62號枱就走，都唔好意思再坐大耐啫。睇佢嘅外賣單張，都晌九龍、新界多處有分店，唔知有無機會繼續大展雄圖，開到過嚟美孚，等小弟多個選擇。

個人評分
味道：7/10
環境：7/10
服務：6/10
抵食：7/10
平均每人消費：HK$42

餐廳資料：
紅茶冰室 Red Tea Cafe
大圍村南道51號地舖
6870 0228