美心 MX；無窮「肉」望

公司有包伙食，提供免費午飯俾同事，今日就特別原因，包伙食嗰邊是日暫停，所以，食番餐出面嘅外賣，但「筆直」有限，唔喺有大食大，故此，大多數都只可以揀吓快餐店之類，而揀「MX」都無特別原因，隨意而已。

因為老婆偏素，但都會食白肉，所以，平常食飯就食素多過肉，睇見呢個「肉望號雜扒飯 」餐，就想放縱一次咁多啦，個餐可揀雞扒或豬扒，再搭埋德國腸、厚切餐肉及煎蛋，包餐飲，賣$45，中環區而言，合理啦！

肉望號雞扒飯 $45

雖然點都唔會好似啲宣傳相咁靚仔，加上外賣嘅，啲賣相就肯定再打啲折扣，不過，份量上就無欺場，拎上手已覺得好重秤，打開個盒真喺滿足晒啲「肉」望，哈哈！

香煎雞扒

大大嚿，又夠厚身，雖然外皮煎得有少少燶，但雞皮一向少食，所以，都無乜所謂，最緊要啲調味都OK，無過鹹嘅弊病，咬落肉質亦唔會「嚡烚烚」。

德國腸

比起一般嘅雞肉腸，用上德國豬肉腸點都喺加分位，仲要鎅埋花，煎得腸衣脆口，入口腸肉唔會好似啲好鬆散嘅雜肉咁，感覺OK喔！

厚切餐肉

有幾厚，睇相就知，真喺堅喺厚切，真喺「肉」望無窮。一食就知唔喺啲平價貨，似啖口喺「長城白豬仔」，當然，整好「新鮮」食就更香口啦，但依家都唔差。

咪睇個飯都喺成兜肉，旁邊仲加咗對椰菜花及西蘭花，不過，無乜味，白烚嘅，仲烚到過腍添。餐飲杯熱奶茶飲咗一半，另一半雪凍佢留番下午茶時間。

個人評分
味道：8/10
環境：7/10
服務：7/10
抵食：8/10
平均每人消費：HK$45

餐廳資料：
美心 MX
中環干諾道中24號中華總商會大廈地下
2140 6689